Şuşanın 3 kəndinin elektrik təchizatı üçün bu şirkətə 2 milyon ayrıldı

“Azərişıq” ASC-nin keçirdirdiyi tender müsabiqələrinin qalibi məlum olub.
Yeniavaz.com xəbər verir ki, tender müsabiqəsinin qalibi – “SMCS” MMC (VÖEN – 1404327661) olub.
“Azərişıq” ASC Şuşa rayonu Aşağıquşçu, Yuxarıquşçu və Qaybalı kəndlərinin xarici elektrik təchizatının təmin olunması məqsədilə 35 kV-luq iki dövrəli ÖİN (SİP-3) elektrik veriliş xəttinin çəkilməsi üçün “SMCS” MMC-yə 2 milyon 69 min 438 manat 62 qəpik ödəyəcək.
Məlumat üçün bildirək ki, tender müsabiqəsinin qalibi olan “SMCS” MMC 20 avqust 2018-ci ildə dövlət qeydiyyatına alınıb. Nizamnamə kapitalı 88 min 500 manat olan şirkətin hüquqi ünvanı Bakı şəhəri Nəsimi rayonu, Cavadxan küçəsi, ev 70, mənzil 19-da yerləşir. MMC-nin qanuni təmsilçisi isə Heydərli Ehtiram Etibar oğludur.

Ehtiram Heydərli

Qeyd edək ki, şirkətin adı əvvəllər “SM Construction Supplies” MMC olub. MMC bu ad altında sonuncu dəfə 2023-cü ilin avqust ayında Abşeron Suvarma Sistemləri İdarəsinin keçirdiyi 37 min manatlıq tender müsabiqəsini udub. Şirkət bu günə kimi dövlət qurumlarının keçirdiyi onlarla tender müsabiqəsində qalib olub.

Elnur Əli