Rusiyanın keçmiş qarışıq döyüş növləri (MMA) döyüşçüsü Həbib Nurməhəmmədov dağıstanlı terrorçulardan birinin onun “Eagles MMA” döyüş sənəti məktəbi ilə əlaqəli olması barədə məlumatı təsdiqləyib.
Yeniavaz.com xəbər verir ki, bu barədə idmançı ötən gün baş verən terror hadisəsini şərh edərkən danışıb.
İdmançı həlak olanların ailələrinə başsağlığı verib, baş verənlərin insan əməllərindən kənara çıxdığını vurğulayıb:
“Şərh etməyə ehtiyac varmı? Bunun qəddar və qeyri-insani bir hərəkət olduğu aydın deyilmi? Bu, harada və nə vaxt başladı?”.
Eyni zamanda Nurməhəmmədovun meneceri Rizvan Maqomedov bildirib ki, Dağıstandakı terror aktlarının təşkilatçılarından biri olan 28 yaşlı MMA döyüşçüsü Hacımurad Kağırov həqiqətən də “Eagles MMA” klubunda məşq edib. Eyni zamanda o, öldürülən terrorçunun Nurməhəmmədovun məktəbinin şagirdi olmadığını vurğulayıb:
“Onu Abdulmanap Nurməhəmmədovun məktəbinin şagirdi adlandırmaq düzgün olmaz. Bu doğru deyil. 2021-ci ildə böyük qardaşı ilə idman zalına gəlib və təxminən bir ay sparrinq edib. Vəssalam. Onu bir daha zalda görməyiblər”.
Qeyd edək ki, Dağıstanda MMA döyüşçülərinin yetişdirildiyi idman bölmələrində kütləvi yoxlamalar aparılacaq. Bu, Həbib Nurməhəmmədovun “Eagles MMA” döyüş sənəti məktəbinin bütün keçmiş iştirakçılarını da əhatə edəcək.
Tətbiqimizi yükləyə bilərsiniz
