Dövlət Neft Şirkəti (SOCAR) və Əbu-Dabi Milli Neft Şirkəti (ADNOC) arasında SARB və “Umm Lulu” neft yataqlarında iştirak payının 3%-nin SOCAR-a verilməsinə dair saziş imzalanıb.
Yeniavaz.com xəbər verir ki, SOCAR-ın prezidenti Rövşən Nəcəfin və ADNOC-un hasilat üzrə icraçı direktoru Abdulmunim Saif Əl Kindinin iştirakı ilə keçirilən imzalanma mərasimində Azərbaycan ilə Birləşmiş Ərəb Əmirlikləri (BƏƏ) arasında strateji enerji tərəfdaşlığına əsaslanan sənədin SOCAR-ADNOC əməkdaşlığının genişləndirilməsinə xidmət etdiyi bildirilib.
Məlumat üçün bildirək ki, “Umm Lulu” neft yatağı Ərəbistan körfəzində, Əbu-Dabidən 30 km şimal-qərbdə yerləşir. Dəniz neft yatağı ADNOC (60%), BP (14,67%), “Total” (13,33%) və Yaponiya Neft İnkişaf Şirkəti (Jodco, 12%) tərəfindən istismar olunur. Yatağın işlənməsi 2,5 milyard dollardan çox investisiya qoyuluşu ilə iki mərhələyə bölünüb.
Yataqdan hasilata 2014-cü ilin oktyabrında yaxınlıqdakı “Umm Əl-Dalx” neft yatağının mövcud qurğularından istifadə etməklə başlanılıb. Layihənin ikinci mərhələsinin hazırlanmasına 2018-ci ilin sentyabrında başlanılıb.
Yatağın tam işləndiyi zaman gündə 105 000 barel xam neft hasil edəcəyi gözlənilir.
Müqayisə üçün bildirək ki, bu ilin ilk rübü ərazində Azərbaycanın ən böyük neft yatağı olan “Azəri-Çıraq-Günəşli” yatağında gündəlik hasilat 339 min barel olub.
SARB (Satah al-Razboot) dəniz neft yatağı isə Abu Dabidən təxminən 200 km şimal-qərbdə yerləşir. Neft yatağının 2016-cı ildə istismara verilməsi ilə BƏƏ-nin ümumi neft hasilat gücü əlavə olaraq gündə 100 min barel artıb.
SARB dəniz neft yatağı ADNOC (60%), “Cepsa” (20%) və OMV (20%) şirkətləri tərəfindən istismar olunur.
Elnur Əli
Tətbiqimizi yükləyə bilərsiniz
