Türkiyədə hakim Ədalət və İnkişaf Partiyası (AKP) son 20 ildə ilk dəfə bələdiyyə seçkilərində ana müxalifət olan Cümhuriyyət Xalq Partiyasına (CHP) uduzub.
Yeniavaz.com TRT-yə istinadla xəbər verir ki, bülletenlərin demək olar ki, 95%-ni hesabladıqdan sonra qeyri-rəsmi ilkin məlumatlara görə, böyük şəhərlərin bələdiyyə sədrləri postu uğrunda mübarizədə CHP 37,3%, AKP 35,7% səs alıb.
CHP metropol statuslu 30 şəhərdən 15-də bələdiyyə seçkilərini qazanıb. Həmçinin 21 əyalətdə də CHP-nin namizədi qalib gəlib. AKP isə 11 böyük şəhər və 12 əyalət paytaxtında qalib gəlib. Eyni zamanda hakimiyyətdə olan partiya Ankara, İstanbul, Antalya və ya İzmiri geri ala bilməyib.
CHP-nin Ankaradakı namizədi Mansur Yavaş AKP-dən əsas rəqibi Turqut Altınoku 32%-ə qarşı 59,5%-lə məğlub edib. Əkrəm İmamoğlu da AKP-nin namizədi Murat Kurumu məğlub edib və ilkin nəticələrə əsasən, 50,8 faizlə İstanbul bələdiyyə başqanı vəzifəsində qalıb. Murat Kurum 40% səs toplayıb. Antalya və İzmir ənənəvi olaraq müxalifətin qalası hesab olunur və orada CHP və AKP namizədləri arasında fərq birincinin xeyrinə təxminən 10% təşkil edir.
Kürd seçicilərin daha çox dəstəklədiyi DEM partiyası üç böyük şəhər və yeddi əyalət mərkəzində qalib gəlib.
AKP-nin seçkiqabağı koalisiyadakı müttəfiqi Milliyyətçi Hərəkat Partiyası (MHP) səkkiz əyalət mərkəzində qalib gəlib.
Tətbiqimizi yükləyə bilərsiniz
