““SpaceX” ABŞ kəşfiyyatı üçün casus peyklər şəbəkəsi yaradır” – “Reuters”

İlon Maska məxsus “SpaceX” şirkəti Amerika kəşfiyyatı ilə gizli müqavilə çərçivəsində yüzlərlə casus peykdən ibarət şəbəkə qurur.
Yeniavaz.com xəbər verir ki, bu barədə “Reuters” mənbələrə istinadən məlumat yayıb.
Bildirilir ki, şirkətin 2021-ci ildə ABŞ Milli Hərbi Kosmik Kəşfiyyat İdarəsi (Pentaqon yanında) ilə imzaladığı 1,8 milyard dollarlıq müqaviləyə əsasən, şəbəkənin yaradılmasına “Starshield” bölməsi cavabdehdir.
“Reuters” ABŞ Müdafiə Nazirliyinin quru qüvvələrini dəstəkləmək üçün nəzərdə tutulmuş aşağı orbitli peyk sistemlərinə əhəmiyyətli investisiyalar yatırdığını göstərir.
Agentliyin həmsöhbətlərinin fikrincə, əgər uğurlu olarsa, “SpaceX” şəbəkəsi Yer kürəsinin demək olar ki, hər yerində potensial hədəfləri tez aşkar etmək üçün ABŞ Silahlı Qüvvələrinin imkanlarını əhəmiyyətli dərəcədə genişləndirəcək. Müqaviləyə əsasən, şirkət aşağı orbitlərdə vahid sistem kimi fəaliyyət göstərə bilən yüzlərlə peyklə yeni kəşfiyyat proqramı yaradır. Bu, Amerika hərbi departamentinə planetin demək olar ki, hər yerindən yüksək keyfiyyətli şəkilləri tez əldə etməyə imkan verəcək.
“Reuters” kəşfiyyat peyklərinin yeni şəbəkəsinin nə vaxt işə düşəcəyini açıqlamayıb. “SpaceX” bu məlumatla bağlı şərh tələblərinə cavab verməyib.