Mərkəzi Bankın qərarı ilə uçot faiz dərəcəsi bu gün 8%-dən 7,75%-ə endirilib.
Yeniavaz.com xəbər verir ki, uçot faiz dərəcəsi sonuncu dəfə bu səviyyəyə 2022-ci ilin 18 mart tarixində endirilib.
Sonrakı tarixlərdə uçot faiz dərəcəsi davamlı olaraq artıb. 2023-cü ilin may ayında 9% səviyyəsinə kimi yüksəlib.
Məlumat üçün bildirək ki, uçot dərəcəsinin dəyişdirilməsində əsas məqsədlərdən biri inflyasiya səviyyəsini nizamlamaqdan ibarətdir.
Mərkəzi Bankdan bidirilib ki, ötən il 12 aylıq inflyasiya 2,1% təşkil edib və bu da nəzərdə tutulan hədəfdən aşağı olub.
Onu da qeyd edək ki, uçot faiz dərəcəsi və ya yenidən maliyyələşmə dərəcəsi mərkəzi bankların ölkənin digər banklarını və maliyyə qurumlarını pul kütləsi ilə təmin etməsidir. Yəni, Mərkəzi Bank banklara və digər maliyyə qurumlarına müəyyən müddət üçün pul verir və onlar həmin pulu geri ödəyərkən üzərində uçot faiz dərəcəsi həcmində əlavə vəsait qaytarırlar. Məsələn, mövcud uçot faiz dərəcəsinə (7,75%) uyğun olaraq Mərkəzi Bankdan 100 min manat götürən hər hansı bank bu vəsaiti bir ildən sonra geri qaytararkən 100 min manatdan əlavə olaraq 7 min 750 manat ödəməli olacaq.
Mərkəzi Banklar bu üsuldan istifadə edərək dövriyyədəki nağd pul kütləsini azaltmağa və bununla da inflyasiyanı cilovlamağa çalışırlar.
Elnur Əli
Tətbiqimizi yükləyə bilərsiniz
