İdeal ata necə olmalıdır?

Yəqin ki, “İdeal ata necə olmalıdır?” sualını siz də özünüzə vermisiniz. İdeal ata uşağının ehtiyac hiss etdiyi həm maddi, həm mənəvi bütün problemləri həll etməyi bacarmalı, necə deyərlər, bu enişli-yoxuşlu həyatda onu düzgün istiqamətləndirməyə çalışmalıdır. Əgər ata bütün bu deyilənləri etməkdə çətinlik çəkirsə, deməli, üzərinə düşən vəzifəni yerinə yetirə bilmir. Digər tərəfdən, çoxlarımızın kiçik bir dövlətə bənzətdiyimiz ailədə ata dovlət başçısı rolunu oynayır. Məhz buna görə də, ailədaxili problemlərdə məsuliyyət ilk növbədə atanın üzərinə düşür. Belə məsələlərdə ana müvəqqəti də olsa, arxa plana keçir. Bəs, ideal ata olmaq üçün daha hansı xüsusiyyətlərə malik olmaq lazımdır?
- İdeal ata ailəsini sevməli, həm həyat yoldaşının, həm də uşaqlarının ona əmanət olduğunu dərk etməlidir.
- İdeal ata uşaqlarının ilk tərbiyəçisi olmalıdır. Onların tərbiyəli və əxlaqlı böyümələri üçün şərait yaratmalıdır. Məktəbdə (və ya həyətdə) dostluq etdiyi uşaqları tanımalıdır.
- Uşaqlarını səhv hərəkətlərdən, həmçinin, səhv düşüncələrdən qorumalıdır.
- Ailəsinə bağlı olmalı, evdə qayda-qanunu, nizam-intizamı təmin etməlidir.
- İdeal ata həm də yaxşı nümunə olmalıdır. Uşaqlarının necə davranmasını istəyirsə, elə də davranmalıdır. Oturuşuna, duruşuna, ümumiyyətlə, bütün hərəkətlərinə qarşı diqqətli olmalıdır.
- İdeal ata ədalətli olmalı, uşaqları arasında ayrı-seçkilik salmamalıdır.
- İdeal ata ailəsinin müəllimi olmalıdır. Yeri gələndə nəsihət verməlidir.
- İdeal ata həmişə yumşaq və nəzakətli davranmalı, mərhəmətli və şəfqətli olmalıdır.
- İdeal ata çox şeyi hərəkətləri ilə başa salmalıdır.
- Evində baş verənlər barədə həyat yoldaşı ilə məsləhətləşməlidir.
- Ən çətin vəziyyətlərdə belə heç kimin haqqını tapdalamamalıdır.
- Həyat yoldaşına və uşaqlarına qiymət verməlidir. Üstəlik, bunu öz hərəkətlərində də hiss etdirməlidir.
- Lazım gələndə onları cəzalandırmalı, ancaq mükafatlandırmağı da unutmamalıdır.
- Uşaqları ilə bağlı xoşagəlməz bir şey eşitdikdə araşdırmadan, öyrənmədən hökm verməməlidir.
- İdeal ata uşaqlarını gələcəyə hazırlamalıdır.

Aygün Vəliyeva