ABŞ-də bir qrup xasid hakimiyyətin Bruklindəki Çabad-Lubaviç hərəkatının qərargahının altında qanunsuz qazılmış tuneli betonla doldurmaq cəhdinə görə polislə toqquşub.
Yeniavaz.com xəbər verir ki, bu barədə ABC telekanalı məlumat yayıb.
Bildirilir ki, 19-21 yaş arası 9 nəfər həbs edilib. Onlara qarşı ərazini pozmaq, əmlaka ziyan vurmaq və dövlət xidmətlərinə mane olmaq ittihamı irəli sürülüb.
Şahidlərin çəkdiyi videogörüntülərdə polisin kərpic divarın içərisindəki boşluqda oturan gənclərlə üz-üzə gəldiyi görünür. Çox güman ki, gənclər bununla tunelin betonla doldurulmasının qarşısını almağa çalışıb. Fəallar polis məmurlarını itələyərək onlara lövhələr atıb, buna cavab olaraq məmurlardan biri gözyaşardıcı qazdan istifadə edib.
Qeyd edilib ki, mərkəzin altındakı tunel bir neçə həftə əvvəl aşkarlanıb. “The New York Post” bildirir ki, o, təxminən bir il ərzində qazılıb. Qonşu evlərin sakinləri zirzəmidən şübhəli səslər gəldiyini bildirdikdən sonra səlahiyyətlilər bundan xəbər tutublar. Təxminən bir metr hündürlükdə və təqribən 15 metr uzunluğunda olan tunel sinaqoqun yerləşdiyi hərəkatın qərargahını əvvəllər “mikveh”, yəni ritual dəstəmaz otağı olan kiçik qonşu bina ilə birləşdirib.
Tətbiqimizi yükləyə bilərsiniz
