Sosial şəbəkələrdə Vətən müharibəsi qazisi Hüseynov Vüqar İlqar oğlunun corab satmasını əks etdirən kadrlar yayılıb.
Yeniavaz.com xəbər verir ki, kadrları lentə alan şəxs bildirib ki, V. Hüseynovun əlilliklə bağlı müraciətinə imtina cavabı gəlib.
Dövlət Tibbi – Sosial Ekspertiza Reabilitasiya Agentliyinin İctimaiyyətlə əlaqələr şöbəsinin müdiri Tural Qurbanov görüntülərlə bağlı məlumat yayıb və bildirib ki, V. Hüseynov işlə təmin edilmək üçün isə ötən dövrdə məşğulluq orqanına müraciət etməyib:
“Bununla əlaqədar bildiririk ki, Ağdaş rayon sakini, 2001-ci il təvəllüdlü Vüqar Hüseynova müharibə veteranı olduğu üçün 01.01.2022-ci il tarixindən Prezidentin aylıq təqaüdü (80 manat) ödənilir.
Müharibədə aldığı xəsarətlə bağlı ona birdəfəlik sığorta ödənişi (2750 manat) də edilib.
Əlilliyinin qiymətləndirilməsi üçün daxil olmuş göndəriş əsasında o, 2021-ci ildə Dövlət Tibbi-Sosial Ekspertiza və Reabilitasiya Agentliyində əyani müayinə edilib.
Aidiyyəti qurumların tibb mütəxəssislərinin də iştirak etdiyi həmin müayinə zamanı Mərkəzi Hərbi Həkim Komissiyasının Vüqar Hüseynovla bağlı təqdim etdiyi yekun şəhadətnamədə qeyd olunan diaqnozun əlillik təyinatına əsas vermədiyi, həmçinin sağlamlıq vəziyyətində əlillik əlaməti olmadığı müəyyən edilib. Bu səbəbdən ona əlillik təyinatı aparılmayıb.
Sonrakı dövrdə Vüqar Hüseynovun əlilliyinin qiymətləndirilməsi ilə bağlı heç bir müraciəti olmayıb”.
Tətbiqimizi yükləyə bilərsiniz
