İran Azərbaycana nota verdi – KİV

İran İslam Respublikasının Bakıdakı səfirliyinin Azərbaycan Xarici İşlər Nazirliyinə etiraz notası təqdim etdiyi deyilir.
Yeniavaz.com xəbər verir ki, bu barədə İranın nüfuzlu mətbuat orqanlarında məlumat dərc olunub.
Qeyd olunur ki, nota “Azərbaycan mediasının İrana qarşı təhqiredici hərəkətləri” ilə bağlıdır.
“Mehr” xəbər agentliyinin məlumatına görə, İran Xarici İşlər Nazirliyinin ictimaiyyətlə əlaqələrindən verilən nota ilə bağlı bildirilib:
“Azərbaycan Respublikasının bəzi KİV-lərinin nalayiq və təhqiredici hərəkətlərinin davam etməsindən sonra İran İslam Respublikasının Bakıdakı səfirliyi bu ölkənin Xarici İşlər Nazirliyinə kəskin etiraz notası təqdim edib. Prosesin dayandırılması və buna görə kompensasiyanın ödənilməsi tələb edilib. Bu media əxlaqsızlığının davam etməsinin iki ölkə arasında gələcək münasibətlərə mənfi və zərərli nəticələri barədə xəbərdarlıq edilib”.
Qeyd edək ki, İran Xarici İşlər Nazirliyinin rəsmi saytında və sosial şəbəkə hesablarında Azərbaycana etiraz notasının verilməsi ilə bağlı hər hansı məlumat dərc olunmayıb.