Avropa İttifaqı Rusiyaya qarşı üzv dövlətlər tərəfindən qəbul edilən və rəsmi təsdiq prosesi bu gün başa çatan 10 sanksiya paketinin təfərrüatlarını açıqlayıb.
Yeniavaz.com xəbər verir ki, müvafiq olaraq, Aİ sanksiya siyahısına 87 şəxs və 34 təşkilat əlavə edib. Rusiyanın hərbi fəaliyyətlərinə, siyasi qərarlarına, dezinformasiyanın yayılmasına, məcburi övladlığa götürülmələrə, həmçinin Ukraynanın mülki əhalisini və infrastrukturunu hədəf alan pilotsuz təyyarələrin hazırlanmasına görə məsuliyyət daşıyanların səyahətləri qadağan edilib və onların aktivləri dondurulub.
Sanksiya siyahısında bir çox dövlət məmuru, o cümlədən Rusiya Federasiya Şurasının üzvləri, 19 nazir müavini, müxtəlif federal qurumların rəhbərləri və Dumanın 4 deputatı yer alıb.
Rusiyanın hərbi vəzifəliləri və Ukraynada yerləşən “Vaqner” qrupunun iki komandiri ilə yanaşı, raketlər, PUA-lar, təyyarələr, hərbi maşınlar, döyüş gəmiləri və ya idarəetmə sistemləri istehsal edən və Rusiya Silahlı Qüvvələrinə tədarük edən şirkətlər də sanksiyaya məruz qalıb.
Ukraynanın qeyri-qanuni ilhaq edilmiş rayonlarının prokurorlarına da sanksiya tətbiq olunub.
Sanksiya siyahısına Rusiyanın böyük televiziya kanalları və media qruplarının yüksək vəzifəli rəhbərləri və aparıcıları da daxil edilib.
Tətbiqimizi yükləyə bilərsiniz
