Bakıda bir məhəllədə yaşayan 13 gəncin 1 milyon manata yaxın vergi borcu yaranıb.
Yeniavaz.com “Xezerxeber.az”a istinadən xəbər verir ki, Sabunçu rayonu, Maştağa qəsəbəsi, Çiləgər adlanan ərazidə yerləşən məhəllənin gəncləri dələduzların qurbanı olduqlarını iddia edirlər.
Onlar 20-30 manat qarşılığında bir neçə sənədə imza atmaqla üzərlərinə külli miqdarda vergi borcu yığıblar. Beləliklə, gənclərin adına 902 min manatdan çox borc gəlib.
Elçin Musayev adlı gənc iddia edir ki, adına 5 şirkət və 228 min manat borc var.
Gənclər aldadıldıqlarını 1 il sonra ünvanlarına gələn məktub sayəsində öyrəniblər.
Onları bu işə yönəldən isə Cəlil Hüseynzadə adlı gənc olub. Lakin o, özü də dələduzların qurbanı olub.
Günahlandırılan şəxs Elnur Şahgəldiyev isə sadəcə vasitəçi olduğunu bildirib. Onun sözlərinə görə, nə pul verib sənəd imzalayanları tanıyır, nə də pul alıb sənəd imzalatdıranları.
Daxili İşlər Nazirliyindən isə bildirilib ki, məsələ ilə əlaqədar gənclərin müraciəti qeydə alınıb və hazırda araşdırma aparılır.
Daha ətraflı videomaterialda:
Qeyd edək ki, daha əvvəl Yeniavaz.com-da Azərbaycanda vətəndaşların etibarından sui-istifadə edərək onların adına şirkətlər qeydiyyatdan keçirən mütəşəkkil cinayətkar şəbəkənin fəaliyyət göstərməsi barədə dəfələrlə yazılar dərc olunub.
Aşağıda linkə keçid edərək bu barədə ətraflı məlumat ala bilərsiniz:
Azərbaycanda insanların xəbəri olmadan adlarına şirkətlər açıb milyonlarla borca salırlar - FAKTLAR
Tətbiqimizi yükləyə bilərsiniz
