“Xadimə Ali kateqoriyadan olan binada süpürgəni daha bərk basıb süpürür?!”

Xəbər verdiyimiz kimi, dövlət orqanlarında çalışan dövlət qulluqçusu olmayan işçilərin (qeydiyyatçı, nəzarətçi, təsərrüfat işçisi, xadimə, dalandar, bağban, gözətçi, ocaqçı, ixtisas dərəcəsi olmayan fəhlə və s.) aylıq vəzifə maaşları artırılıb.
Yeniavaz.com xəbər verir ki, iqtisadçı ekspert Natiq Cəfərli sosial şəbəkə hesabındakı paylaşımında bu qərarı şərh edib.
“Dövlət orqanlarında çalışan dövlət qulluqçusu olmayan işçilərin aylıq vəzifə maaşları 2023-cü il yanvarın 1-dən aşağıdakı məbləğdə müəyyən edilib: 1) Ali kateqoriya dövlət orqanlarında 400 manat, 2) 1-ci kateqoriya dövlət orqanlarında 385 manat, 3) 2-ci və 3-cü kateqoriya dövlət orqanlarında 365 manat, 4) 4-cü və 5-ci kateqoriya dövlət orqanlarında 345 manat. Maaşların çox kiçik olması bir qırağa, qərarın absurdluğu bilirsiniz nədir?! Hökumət başa düşməlidir ki, məsələn, xadimə üçün binanın Ali, və ya 5-ci kateqoriya aid olmasının heç bir fərqi yoxdur - Ali kateqoriya olanda süpürgəni daha bərk basıb süpürür?! Daha çox güc sərf edir?! Və ya Ali və ya 4-cü kateqoriyaya aid binaların həyətində bitən ağaclar daha fərqli olur ki, bağban onları sulamağa 55 manat daha çox pul alır?! Ya da, ixtisası olmayan fəhlə üçün nə fərqi var ki, hansı kateqoroyaya aid binada kürəyində yük daşıyır?! Maaş fərqi iş saatına, həcminə, ixtisas və bacarıq göstəricilərinə görə ola bilər, amma eyni iş görən işçilərin binanın hansı kateqoriyaya aid olmasına görə maaş fərqi olmamalıdır. Bu absurddur”, - N.Cəfərli bildirib.