Bəxtiyar Hacıyevə qarşı yeni ittihamlar qaldırıldı

İctimai fəal Bəxtiyar Hacıyevə qarşı yeni ittihamlar qaldırılıb.
Yeniavaz.com xəbər verir ki, bu barədə onun vəkili Aqil Layıc məlumat yayıb.
O bildirib ki, ictimai fəala qarşı Azərbaycan Respublikasının Cinayət Məcəlləsinin 221.2.2-ci  (ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə törədildikdə) və 289.1-ci (Məhkəmə baxışı iştirakçılarını təhqir etməklə məhkəməyə hörmətsizlik etmə) maddələri ilə cinayət işi qaldırılıb.
Qeyd edək ki, CM-in 221.2.2-ci maddəsi ilə təqsirli bilinən şəxslərin iki ilədək müddətə islah işləri və ya üç ilədək müddətə azadlığın məhdudlaşdırılması və ya bir ildən üç ilədək müddətə azadlıqdan məhrum etmə ilə cəzalandırılması nəzərdə tutulur.
289.1-ci maddə ilə təqsirli bilinən şəxslərin isə beş yüz manatdan min manatadək miqdarda cərimə və ya üç yüz iyirmi saatdan dörd yüz saatadək ictimai işlər və ya altı ayadək müddətə azadlıqdan məhrum etmə ilə cəzalandırılması nəzərdə tutulur.
Qeyd edək ki, B. Hacıyev dekabrın 9-da saxlanılıb və ona qarşı xuliqanlıq və məhkəməyə hörmətsizlik ittihamları irəli sürülüb. Elə həmin gün Bakının Xətai rayon məhkəməsi Hacıyevi 1 ay 20 gün müddətinə həbs edib.