İsrailin nüfuzlu mətbuat orqanı “Yedioth Ahronot”, İstanbuldakı terror aktını törədən qadının təhlükəsizlik kameraları tərəfindən lentə alınmış görüntülərində yanından keçən iki qadının israilli olduğunu açıqlayıb.
Yeniavaz.com xəbər verir ki, qəzet, İranın İRNA xəbər agentliyinin bu görüntünü paylaşdığını və hücumun arxasında İsrailin olduğunu iddia etdiyini yazıb.
Yazıda İsrailin cənubundakı Aşdod şəhərindən Türkiyəyə gedən qadınların turist olduğu bildirilib.
Qəzet Or Atedgi və Natali Suissa adlı qadınların bir qrup qadınla Türkiyəyə tətilə getdiyini və İsrailə qayıtdığını yazıb. Atedginin həyat yoldaşı və Suissanın böyük qardaşı Liran Atedgi bu barədə İsrailin yerli mediasına danışıb:
"Or və Natali ən azı 8 digər israilli qadınla tətildə idi. Tətillərinin son gününü alış-veriş üçün ayırmışdılar. Həyat yoldaşım və bacım istəmədən terrorçunun yanından keçib. Onlar bir mağazada dayanan zaman qadın oradan keçib və bəlkə də 50 metr aralıda bombalı hücum təşkil edib”.
Qeyd edək ki, İranın xəbər agentliyi İRNA qadınların fotosunu paylaşaraq, "İki israilli qadının hücumda şübhəli bilinən şəxslə birlikdə gəzdiyi görünür" şərhini yazıb.
Xatırladaq ki, Türkiyənin İstanbul şəhərində 6 nəfərin həyatını itirdiyi, 81 nəfərin yaralandığı terror aktını törətdiyi iddia edilən qadın partlayışdan dərhal sonra keçirilən əməliyyatla saxlanılıb.
Tətbiqimizi yükləyə bilərsiniz
