Son 10 gün ərzində “Azəriqaz” İstehsalat Birliyinin abonentlərinin bəzilərinə müqavilənin uzadılması ilə bağlı göndərilən SMS bildirişlər İB-ə ev və mənzillərdə texniki müayinələrin aparılması səlahiyyətlərinin verilməsi ilə bağlıdır.
Yeniavaz.com APA-ya istinadka xəbər verir ki, bu barədə "Azəriqaz" İB-nin baş direktoru Ruslan Əliyev deyib.
“Son 10 gün ərzində bəzilərinizə müqavilələrin bağlanılması ilə bağlı SMS bildirişlər gəlir. Bu vacibdir, çünki, Prezidentin məlum sərəncamından sonra artıq evlərdə texniki müayinələrin keçirilməsi “Azəriqaz" İstehsalat Birliyinə tapşırılıb. Təhlükəsizliyin qorunması, bu işlərin daha məsuliyyətli həyata keçirilməsi üçün müqavilənin bağlanması vacibdir”, - Ruslan Əliyev qeyd edib.
Onun sözlərinə görə, bəzi abonentlərin müqavilələri AGİS (Avtomatlaşdırılmış Qaz İnformasiya Sistemi) elektron bazasında əks olunmadığından onlara bildirişlər göndərilib ki, həmin abonentlərlə müqavilə bağlanılsın və sonra da onlar elektron formada işlənilsin: "Bu SMS bildirişlərlə bağlı bizə müxtəlif suallar olur, burada heç bir narahatçılıq yoxdur, sadəcə bu bir xəbərdarlıqdır. Sizdən xahişim budur ki, ASAN Xidmət mərkəzlərinə müraciət edəsiniz və öz müqavilələrinizi bağlayasız. Çünki biz AGİS-də abunə bazasının elektron hissəsində SMS göndərilən həmin abonentlərin müqavilələrini görmürük. Həmin müqavilələr elektron formada işləndikdən sonra biz sizi bir daha bu məsələ ilə bağlı narahat etməyəcik, müqavilələr birdəfəlik bağlanılır. Əgər heç bir dəyişiklik olmasa müqavilə avtomatik olaraq özü uzadılır".
Xatırladaq ki, 25 fevral 2022-ci il tarixində Prezident İlham Əliyev “Qaz təchizatı haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu imzalayıb. Qanun 1 may 2022-ci il tarixindən qüvvəyə minib.
Tətbiqimizi yükləyə bilərsiniz
