"Naxçıvanda uşaqlara türk kökənli adların qoyulmasına icazə verilmir"

Naxçıvanda yeni doğulan uşaqlara Türkay, Ərtoğrul, Selin, Çidəm, Çilənay, Albas kimi türk kökənli adların qoyulmasına icazə verilmədiyi iddia edilir.
Yeniavaz.com xəbər verir ki, bu barədə “Gündəlik Naxçıvan”a bir qrup valideyn məlumat verib.
Şikayətçilərin sözlərinə görə, bu adların yerinə onlara Zöhrə, Zəhra, Leyla, Ayşə, Məhəmməd, Hüseyn, Həsən kimi adlar təklif edirlər.
Ordubad rayon sakini Əsgər Ağayev deyir ki, yeni doğulan qız uşağının adını Selin qoymaq istəyib. Lakin yaşadığı ərazinin icra nümayəndəliyi buna imkan verməyib:
“Təzə anadan olan övladıma doğum haqqında şəhadətnamə almaq üçün ötən ay kəndimizin icra nümayəndəliyinə getdim. Nə ad qoyacağımı soruşdular. Dedim ki, Selin qoyacağam. Dedilər ki, ilk öncə rayon qeydiyyat şöbəsindən soruşaq, görək bu ada icazə verirlər, ya yox. Zəng edib danışdılar. Sonra dedilər ki, türk adları olmaz, yuxarıdan başqa adlar təklif edirlər, istədiyini seç. Zöhrə, Zəhra, Leyla, Ayşə, Zeynəb  və s. adlar sadaladılar. Etiraz etsəm də, əhəmiyyəti olmadı. Məcburiyyət qarşısında qalıb uşağın adını Zeynəb qoydum. Çünki nənəmin adı idi. Düşündüm ki, istədiyim ada imkan vermirlərsə, heç olmazsa, nənəmin adını qoyum. Onlar təklif etdiyi adlara da uyğun gəlir”.
Şərur rayonundan olan digər şikayətçi Zamin Seyidov deyir ki, övladına istədiyi adı qoymaq ona da nəsib olmayıb:
“Türkiyədə yaxın bir dostum var, adı Türkaydır. Onun şərəfinə yeni doğulan oğluma da eyni adı qoymaq istədim. Günlərlə məni get-gələ saldılar. Axırda elə bezdirdilər ki, onların təklif etdiyi adlardan birini seçib qoydum. Rəsmilərin təklif etdiyi oğlan adları ərəb ya da fars kökənlidir. İstədiyimiz adı seçməmizə qadağa qoyulması bizim hüquqların pozulmasıdır. Əgər bu adlar Azərbaycanda qadağandırsa, Bakıda və digər bölgələrdə niyə icazə verilir?”
İddialarla bağlı Naxçıvan Muxtar Respublikası Ədliyyə Nazirliyi ilə əlaqə saxladıq. Nazirlikdən bizə belə cavab verildi:
“Onunla bağlı heç bir məlumatımız yoxdur”.
Qeyd edək ki, Ədliyyə Nazirliyinin rəsmi saytında "Adlar üzrə statistika" bölməsində son 5 il ərzində 60 nəfərə Türkay, 558 nəfər isə Selin adının qoyulduğu göstərilir.