Türkmənistanın keçmiş prezidenti, ölkə parlamentinin yuxarı palatasının sədri Qurbanqulu Berdiməhəmmədov tikilməkdə olan yeni şəhərin prospektlərindən birinə atı Axanın (Ağ Xan) adının verilməsini təklif edib.
Yeniavaz.com xəbər verir ki, bu barədə “Neytral Türkmənistan” qəzeti məlumat yayıb.
O, bu təklifi mayın 29-da Axal vilayətinin gələcək inzibati mərkəzinin tikintisi ilə tanış olarkən səsləndirib.
Orada şəhərin gələcək meri Şamuhammet Durdylievin iştirakı ilə keçirilən iclasda ölkə Prezidenti Serdar Berdiməhəmmədovun şəhərdə Axanın abidəsinin ucaldılması təklifi müzakirə olunub. Daha sonra Qurbanqulu Berdiməhəmmədov abidənin qoyulacağı prospektə Axanın şərəfinə adlandırılmasını təklif edib. İclas iştirakçıları bu təklifi dəstəkləyiblər.
Qeyd edək ki, Axan Qurbanqulu Berdiməhəmmədovun hələ Türkmənistan prezidenti olarkən şəxsən yetişdirdiyi atdır. 2018-ci ildə Axan arxa ayaqları üzərində 10 metr məsafəni 4,19 saniyəyə qət etməklə məşhurlaşıb və bu, Ginnesin Rekordlar Kitabına düşüb.
Türkmənistanın ilk "ağıllı" şəhəri olan, dəyəri 1,5 milyard dollar hesablanan Axal vilayətinin yeni inzibati mərkəzi Aşqabaddan 30 kilometr cənub-qərbdə tikilir. Bu şəhərin birinci mərhələsinin tikintisi 2022-ci ilin dekabrında başa çatmalıdır. Şəhərin adı hələ açıqlanmayıb.
Tətbiqimizi yükləyə bilərsiniz
