Bərdə Regional Mədəniyyət İdarəsində regional idarənin əhatə etdiyi Bərdə və Tərtər rayonlarından, Mingəçevir və Yevlax şəhərlərindən olan mədəniyyət işçiləri ilə görüş keçirilib.
Yeniavaz.com xəbər verir ki, mədəniyyət işçiləri öncə Bərdə şəhərində yerləşən Şəhidlər Xiyabanını ziyarət edərək, torpaqlarımızın ərazi bütövlüyü uğrunda canlarını fəda edərək şəhidlik zirvəsinə ucalmış qəhrəmanlarımızı yad edib.
Daha sonra çıxış edən regional idarənin rəisi Vəsilə Möhsümova mədəniyyət müəssisələrinin hazırkı vəziyyəti, mövcud problemlər, mədəniyyət sahəsində qarşıda duran hədəflər, bu sahədə mədəniyyət işçilərinin üzərinə düşən vəzifələr, regionda əhaliyə göstərilən mədəni xidmət səviyyəsinin yüksəldilməsindən və bununla bağlı regional idarənin qarşısına qoyduğu məqsədlərdən geniş söz açıb.
O, çıxışında qeyd edib ki, mədəniyyət müəssisələri insanlarla qarşılıqlı sıx əlaqədə işləməli, insanların mədəniyyət sahəsinə diqqətini artırmalı və onların mədəni-kütləvi tədbirlərdə iştirakı təmin edilməli, mədəniyyət müəssisələri fəaliyyət istiqamətlərini günün tələblərinə uyğun qurmalı, oxucuların kitabxanalara marağının daha da artırılması məqsədiilə “book-cafe”lər yaradılmalı, mədəniyyət müəssisələrində fəaliyyət göstərən dərnək üzvləri işlərini günün tələbləri səviyyəsində qurmalıdır.
Həmçinin mədəniyyət müəssisələrində şəffaflığın tam təmin edilməsi, əmək intizamına ciddi riayət olunması, mövcud olan nöqsanların qısa müddət ərzində aradan qaldırılması, gənc və ixtisaslı kadrların önə çəkilməsi, sənədləşdirmə işlərinin düzgün aparılması, KİV-nin nümayəndələri ilə sıx əlaqələrin qurulması, keçirilən tədbirlərin və görülən işlərin sosial media platformalarında daha geniş şəkildə işıqlandırılması ilə bağlı tapşırıqlarını çatdırıb.
Regional idarənin rəisi vurğulayıb ki, Azərbaycan Respublikasının Prezidenti cənab İlham Əliyevin göstəriş və sərəncamları ilə Vətənin müstəqilliyi uğrunda sinəsini sipər etmiş şəhidlərimizin ailələrinə və qazilərimizə dövlət qayğısının göstərilməsi, onların sosial rifahının təmin edilməsi məsələləri daim diqqətdə saxlanılır. Bildirib ki, bu ənənəyə uyğun olaraq Bərdə Regional Mədəniyyət İdarəsinin əhatə etdiyi şəhər və rayonlarda çalışan mədəniyyət işçiləri şəhid ailələrini, qaziləri və müharibə iştirakçıları daim diqqət mərkəzində saxlamalı, onları mütəmadi olaraq ziyarət etməlidir.
Sonda mədəniyyət işçilərinin sual və təklifləri dinlənilib, onlarla fikir mübadiləsi aparılıb.
Esmira Hidayətova, Bərdə
Tətbiqimizi yükləyə bilərsiniz
