![](https://cdn.yeniavaz.com/uploadedfiles/custom/2019/5/27/1/053acea3-e2e8-4c1d-a171-449213b9ff15/azal-air.jpg)
“Azərbaycan Hava Yolları” Qapalı Səhimdar Cəmiyyəti (AZAL) tərəfindən keçirilən tender müsabiqələrinin qalibləri məlum olub.
Yeniavaz.com-un məlumatına görə, tender müsabiqələrinin qalibləri “Day.az” MMC və “Trend Analitik İnformasiya Agentliyi” MMC olub.
Müsabiqənin şərtinə görə “Day.az” MMC-yə məxsus “milli.az” və “day.az” internet saytlarında 11 ay ərzində AZAL-ın reklamları yerləşdiriləcək. Reklam formatındakı məlumat sayt yüklənəndən əvvəl 8-10 saniyə ərzində kompyuterin ekranında yer almalıdır. AZAL bu xidmətin qarşılığında “milli.az” və “day.az” saytlarına 43 min 591 manat 12 qəpik ödəyəcək.
“Trend Analitik İnformasiya Agentliyi” MMC-yə məxsus “trend.az” internet saytında isə AZAL-a məxsus press relizlər 11 ay ərzində yayımlanacaq və sosial şəbəkələrdə paylaşılacaq. Bu xidmətlər üçün də AZAL “trend.az” saytına isə 28 min 966 manat 95 qəpik ödəyəcək.
A. Cəfərov