Maqsud Mahmudov: "Həmin vaxt İlhama 28 min manatlıq tapança verdim"

Ukraynada tutularaq Azərbaycana gətirilən iş adamı Maqsud Mahmudovun cinayət işi üzrə məhkəmə prosesi davam etdirilib.

Yeniavaz.com APA-ya istinadla xəbər verir ki, Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən iclasda zərərçəkmiş şəxslər ifadə verib. 

Zərərçəkmiş qismində ilk olaraq uzun illər gömrük sistemində çalışmış İlham Kərimov ifadə verib.

İ.Kərimov bildirib ki, təqsirləndirilən şəxs 57 min manat verəcəyini deyərək, ondan 32 ədəd qızıl beşlik sikkə alıb. O, bu günə qədər nə pulunu, nə sikkələri geri ala bildiyini deyib: "Maqsud Mahmudovu 10 ildən artıqdır tanıyıram. Buna görə etibar edib razılaşdım. Əvvəl söz verdi ki, bir ay ərzində pulu ödəyəcək. Sonra da eşitdim ki, Ukraynaya gedib. Mən verdiyim sikkələri tələb edirəm".

Maqsud Mahmudov zərərçəkmiş şəxsin ifadəsi ilə razılaşmayıb.

Təqsirləndirilən şəxs bildirib ki, həmin qızıl beşlikləri əvvəl verdiyi brilyant tapança ilə əvəz edib: "Ondan beşlikləri almazdan üç gün əvvəl görüşümüz oldu. Həmin vaxt İlhama 28 min manatlıq tapança verdim, bununla da əvəzləşmiş olduq".

Zərərçəkmiş şəxs Maqsud Mahmudovun dedikləri ilə razılaşmayaraq həmin söhbətin bu məsələyə aidiyyəti olmadığını deyib.

Daha sonra zərərçəkmiş qismində qızıl alış-verişi ilə məşğul olan şirkətdə işləyən Məzahir Ağayev ifadə verib. O, Maqsud Mahmudovun ona 100 min manat borcu olduğunu bildirib: "Həmin vaxt kirayədə yaşayırdım, şəxsi evimin olmaması yaralı yerim idi. Maqsud da boş damarımı tutdu, 100 min manatlıq qızıl verdim. Birlikdə danışığımız əks olunmuş videogörüntü də var. Bu günə qədər də pulu ala bilməmişəm".

Maqsud Mahmudov zərərçəkmiş şəxsin ifadəsinin doğru olmadığını bildirərək Məzahir Ağayevə mənzil verdiyini deyib.

Proses fevralın 21-də davam etdiriləcək.

Qeyd edək ki, M. Mahmudova Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) , 182.2.2 ( (təkrar hədə-qorxu ilə tələb etmə) və 133.2.2 (xüsusi dəyəri olan əşyaları talama - təkrar törədildikdə) maddələri ilə ittiham elan olunub. Daxili İşlər Nazirliyi tərəfindən beynəlxalq axtarışa verilmiş Mahmudov Maqsud Soltan oğlu ötən ilin iyul ayında Ukrayna ərazisində tutulub. O, sentyabrın 18-də Ukraynadan Azərbaycana gətirilərək istintaqa təhvil verilib.

İş üzrə 91 nəfər zərərçəkmiş kimi tanınıb.