Meyitlərin yanında oturaraq polisi gözləyib - Dəhşətli qətlin detalları

Goranboy rayonunda bacı və qardaşın qətli ilə bağlı bəzi məqamlar məlum olub.
Rayonun Qarasüleymanlı kəndində yerləşən torpaq sahəsinə görə kəndlilər arasındakı münaqişə yekunda qətllə nəticələnib. Cinayət hadisəsi də elə həmin torpaq sahəsində baş verib.
Kənd sakini, 1965-ci il təvəllüdlü İlham Haqverdiyev həmkəndliləri 52 yaşlı Pərviz Namazov və onun bacısı, 62 yaşlı Səlmini bıçaqlayaraq öldürüb.
Yeniavaz.com "qafqazinfo"ya istinadla xəbər verir ki, onların öldüyünə əmin olduqdan sonra DİN-in 102 xidmətinə zəng edərək qətl törətdiyi barədə məlumat verib. İ.Haqverdiyev polislər gələnədək bir müddət meyitlərin yanında oturaraq gözləyib.
İlkin dindirmə zamanı İ. Haqverdiyev deyib ki, həmin torpaq sahəsi uzun müddət onların arasında mübahisəli olub. Bir müddət öncə məhkəmə qərarı ilə torpaq İlhama verilib. Bu gün İ.Haqverdiyev torpaq sahəsinə gəldikləri bacı-qardaşın orda olduğunu görüb və aralarında yaranan mübahisə zamanı maşınında olan bıçaqla onların hər ikisini vurub.
İlham Haqverdiyev şübhəli şəxs qismində tutularaq istintaqa cəlb olunub. Faktla bağlı Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə cinayət işi başlanıb.
 

***09:50
Prokurorluq Goranboyda bacı və qardaşın qətli ilə bağlı məlumat yayıb.
Yeniavaz.com daxil ilan məlumatda deyilir:
"Fevralın 6-sı saat 17 radələrində rayonun Qarasüleymanlı kəndi ərazisində kənd sakinləri - 1970-ci il təvəllüdlü Pərviz Namazov və bacısı 1960-cı il təvəllüdlü Səlmi Namazovanın öldürülmələri barədə rayon prokurorluğuna məlumat daxil olub.
Aparılan ilkin araşdırmalarla zərərçəkmişlərin həmkəndlisi, 1965-ci il təvəllüdlü İlham Haqverdiyevin torpaq mübahisəsi ilə əlaqədar aralarında yaranan münaqişə zamanı Pərviz Namazov və Səlmi Namazovaya bıçaqla xəsarətlər yetirərək onları qəsdən öldürməsinə əsaslı şübhələr müəyyən edilib.
İlham Haqverdiyev şübhəli şəxs qismində tutularaq istimtaqa cəlb olunub.
Faktla bağlı Goranboy Rayon Prokurorluğunda Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə cinayət işi başlanılıb.
Hazırda cinayət işi üzrə istintaq tədbirləri davam edir".