Yevlaxda itkin düşən 13 yaşlı qızı əmisi qaçırıbmış

Yevlaxda 13 yaşlı qardaşı qızını qaçırıb təcavüz edən şəxs həbs edilib.
Daxili İşlər Nazirliyinin Mətbuat xidmətinin Bərdə regional qrupundan Yeniavaz.com-un sorğusuna cavab olaraq bildirilib ki, dekabrın 13-də Yevlax rayon sakini İ.Mustafayevin qızı N.M. və qardaşı Elçin Mustafayevin itkin düşməsi ilə bağlı Rayon Polis Şöbəsinə etdiyi müraciətlə əlaqədar müvafiq tədbirlərə başlanılıb.
Araşdırmalarla E.Mustafayevin qardaşı qızını Bakı şəhərinə apardığı müəyyənləşdirilib. Onların qaldıqları yer aşkar olunaraq Yevlax Rayon Polis Şöbəsinə gətiriliblər.
Məlum olub ki, əmisi qızı qaçırdığı müddətdə ona qarşı seksual xarakterli hərəkətlər edib.
Faktla bağlı Cinayət Məcəlləsinin 150.3.3 (14 yaşına çatmayan şəxsə qarşı seksual xarakterli hərəkətlər etmə) və 152.2-ci (14 yaşına çatmayan şəxslə cinsi əlaqədə olma) maddələri ilə cinayət işi başlanılıb, istintaq davam etdirilir.
Qeyd edək ki, N.M. 2008-ci il təvəllüdlüdür. E.Mustafayevin yaşı isə 40-dan çoxdur.