Azərbaycan Yardımlının Əsədoba kəndində yaşayan Səkinə ananı Vətən müharibəsinin gedişində tanımışdı. "O fotodakı şəhid anası" Səkinə ana idi..
Adını bilməyənlər, tanımayanlar onu elə bu cür də təqdim edirdi. O, şəhid oğlu Cavid Sarhatovun tabutunu son mənzilə başının üzərində aparan anadır!
Yeniavaz.com “Qafqazinfo”ya istinadla xəbər verir ki, Ana belə addım atmasının çox həssas və maraqlı hekayəsi olduğunu bildirib:
"Cavidin beş yaşı olanda bulağa getmişdik, orada üst-başını batırmışdı. Onu bulaqda çimizdirdim, ayağına tikan batmasın deyə, evə teştin içində, başımın üzərində gətirdim. Ermənilərin qolu qurusun, bilmədim Cavidi harasından vurub yaraladılar".
Səkinə ana müharibə zamanı təkcə Caviddən yox, digər oğlu Səbuhidən də xəbər gözləyib. Gizir Cavid Sarhatovdan fərqli olaraq, Səbuhi Sarhatov ehtiyatda olan zabit kimi döyüşlərə çağırılıb, qardaşı şəhid olanda bir müddət sonra müdafiə nazirinin əmriylə ehtiyata buraxılıb.
Hazırda Yardımlıda şəhər məktəbində Azərbaycan dilli müəllimi kimi çalışan Vətən müharibəsi iştirakçısı şəhid qardaşını xatırlayarkən bildirib ki, döyüşlərdə olduğu üçün Cavidin dəfnində iştirak edə bilməyib:
“Mən təkcə qardaş yox, bir hərbçi, bir zabiti, Azərbaycan isə öz müdafiəçisini itirdi. Əslində, analar bizim baş tacımızdır, amma anam şəhid oğlunu baş tacı etdi".
Səkinə ana hər gün oğlunun məzarını ziyarət edir, hər gün ağladığını, bunu etməsə, ürəyinin sakitləşə bilmədiyini deyir.
Tətbiqimizi yükləyə bilərsiniz
