Gələn il Azərbaycanın dövlət büdcəsində gözlənilən 26 milyard 816 milyon manat gəlirin 14 milyard 690 milyon manatı və yaxud 54,8 %-i neft sektorunun, 12 milyard 126 milyon manatı və yaxud 45,2 %-i isə qeyri-neft sektorunun hesabına formalaşacaq.
Bu məsələ "2022-ci il dövlət büdcəsi zərfi haqqında” qanun layihəsində əksini tapıb.
Sənədə əsasən, bunlar, bu ilin təsdiq olunmuş göstəriciləri ilə müqayisədə müvafiq olaraq 6,6 % və 4,1 % çoxdur.
Büdcənin neft gəlirlərinin 12 milyard 710 milyon manatını və yaxud 86,5 %-ni Dövlət Neft Fondundan (ARDNF) transfertlər, 1 milyard 980 milyon manatını və yaxud 13,5 %-ni isə vergi orqanlarının xətti ilə neft sektorundan daxilolmalar təşkil edəcək. O cümlədən gələn il SOCAR-ın büdcə ödənişləri 1 milyard 350 milyon manat, Hasilatın Pay Bölgüsü sazişlərindən mənfəət vergisi ödəmələri isə 630 milyon manat təşkil edəcək.
Büdcənin qeyri-neft gəlirlərinin isə 6 milyard 840 milyon manatı və yaxud 56,4 %-i vergi orqanlarının xətti ilə daxilolmalar, 4 milyard 260 milyon manatı və yaxud 35,1 %-i gömrük orqanlarının xətti ilə daxilolmalar, 1 milyard 026 milyon manatı və yaxud 8,5 %-i isə digər gəlirlər olacaq. / Report
Tətbiqimizi yükləyə bilərsiniz
