Gürcüstanın keçmiş prezidenti Mixail Saakaşvili baxılan cinayət işləri üzrə məhkəmə iclaslarının təyin olunmadığı ilə bağlı beynəlxalq ictimaiyyətə müraciət edib.
Yeniavaz.com xəbər verir ki, bu barədə onun feysbuk sosial şəbəkə hesabında paylaşım edilib.
"Beynəlxalq ictimaiyyətə müraciətim: 1 oktyabrda saxlanıldım və həbs olundum. Heç kimin tanımadığı iki məhkəmə hökmü və iki yarımçıq qalmış iş üçün barəmdə həbs qərarı verilib. Qanunvericiliyə uyğun olaraq Gürcüstanda davam edən bir iş əsasında saxlanılan hər hansı bir şəxs dərhal məhkəməyə gətirilməlidir. Mən 9 gündür ki, məhkəmə iclası olmadan həbsxanada yatıram və iş üzrə hakim bu gün vəkilimə heç bir dinləmənin gözlənilmədiyini söyləyib. Növbəti həftələrdə planlaşdırılan bələdiyyə seçkilərinin ikinci turundan əvvəl məni ictimaiyyətdən kənarda saxlamaq cəhdi var. Demək olar ki, hər bir böyük şəhərdə mənim partiyam İvanişvilinin partiyası ilə çiyin-çiyinə gedir", - paylaşımda yazılıb.
Qeyd edək ki, Saakaşvili 2 oktyabrda yerli özünüidarəetmə orqanlarına seçkilərə qədər vətəninə qayıtmaq niyyətində olduğunu bildirmişdi. O, elan etdiyi vaxtdan əvvəl xəbərsiz şəkildə Gürcüstan sərhədini keçdikdən sonra orada olduğunu elan etmiş və Batumidən video paylaşmışdı. Bundan sonra eks-prezident Tbilisidə olduğu evdə saxlanılmışdı.
Tətbiqimizi yükləyə bilərsiniz
