Səmədağa Şıxlarovun ölümünün təfərrüatları açıqlandı – YENİLƏNİB

"Neftçi" klubunun sabiq futbolçusu Səmədağa Şıxlarovun ölümü ilə bağlı bəzi təfərrüatlar bəlli olub.
Yeniavaz.com "report"a istinadla xəbər verir ki, bu barədə mərhumun çalışdığı Azərbaycan Həndbol Federasiyanın (AHF) İdman şöbəsinin müdiri İsgəndər Əsgərov məlumat verib.
O bildirib ki, Şıxlarovu evinin yaxınlığındakı yolu keçərkən maşın vurub: "Hadisə Həsən Əliyev küçəsi ilə Azadlıq prospektinin kəsişməsində, "Neftçi" klubunun bazasına çatmamış baş verib. Şıxlarovu vuran şəxs hadisə yerindən qaçmayıb. Onu tutmayıblar, özü orada qalmışdı, heç yerə getməmişdi. Hadisə müşahidə kamerasının altında olub. Müvafiq qurumlar olayla bağlı araşdırma aparacaqlar".
Əsgərovun sözlərinə görə, Şıxlarov AHF-nin İdman şöbəsində metodist vəzifəsində çalışıb.
Mərhumun harada dəfn ediləcəyi hələlik məlum deyil.

***15:12
"Neftçi" klubunun veteran futbolçusu Səmədağa Şıxlarov dünyasını dəyişib.
Yeniavaz.com xəbər verir ki, bu barədə Report-a Futbol Veteranları İttifaqının sədri Oqtay Abdullayev məlumat verib.
Onun sözlərinə görə, Şıxlarovu az öncə Həsən Əliyev küçəsi ilə Azadlıq prospektinin kəsişməsində Jeep markalı avtomobil vurub.
Şıxlarov hadisə yerindəcə keçinib. O, ekspertiza üçün morqa aparılıb. O. Abdullayev veteranlar adından mərhumun ailəsinə baş sağlığı verib.