Bir qrup sürücü Baş Dövlət Yol Polisi İdarəsi önündə etiraz aksiyası keçiriblər.
Yeniavaz.com xəbər verir ki, bu barədə Avtomobil Tv məlumat yayıb.
Aksiya keçirən sürücülər bildiriblər ki, YPX əməkdaşları onların idarə etdikləri "Toyota Prius" markalı avtomobilləri katalizatorunun olmamasını bəhanə edərək duracağa aparırlar.
Avtomobilləri bir neçə günlük müvəqqəti duracağa qoyulan sürücülər məsələnin həll olunmasını istəyiblər.
Daha ətraflı videosüjetdə:
Qeyd edək ki, Bakı şəhər Dövlət Yol Polisi İdarəsi sosial şəbəkələrdə katalizatoru olmayan avtomobillərin saxlanılaraq cərimə edilməsi ilə bağlı yayılan məlumatlara münasibət bildirib.
İdarənin şöbə rəisi, polis polkovniki Vaqif Əsədov Yeniavaz.com-a bildirib ki, nəqliyyat vasitələrində katalizatorların olmaması ətraf mühitə atılan zəhərli qazların miqdarını və mühərrikin səs gücünü artırır, bu isə inzibati xəta tərkibi yaradır:“Bu tipli avtomobillərin istismarı yolverilməzdir. Bir daha vətəndaşlardan xahiş edirik ki, idarə etdikləri nəqliyyat vasitəsinin sazlığına diqqət etsinlər, mövcud çatışmazlığın aradan qaldırılması üçün lazımi tədbirlər görsünlər. Texniki baxış zamanı və yaxud avtomobili servisə apararkən nasazlıq qeydə alındıqda, həmin nasazlıqlar aradan qaldırılmalıdır. Bəzi sürücülər deyir ki, həmin avtomobilləri Gürcüstandan elə bu vəziyyətdə Azərbaycana gətiriblər. Amma qanun deyir ki, sürücü idarə etdiyi nəqliyyat vasitəsini saz vəziyyətdə saxlamalıdır. Yəni, texniki nasazlıq varsa, bunu sürücü aradan qaldırmalıdır. Azərbaycanda yol hərəkəti təhlükəsizliyi və ətraf mühitin qorunması Dövlət Proqramı səviyyəsində təmin edilirsə hər birimiz bu sahədə öz məsuliyyətimizi dərk etməliyik”.
Tətbiqimizi yükləyə bilərsiniz
