Bu ilin birinci rübü ərzində Azərbaycanın ixracı 4,1 milyard dollar olub və bunun 12%-i və ya 501,5 milyon dolları qeyri-neft sektorunun payına düşüb.
Yeniavaz.com açqılanan rəsmi məlumatlara istinadən xəbər verir ki, qeyri-neft sektoru üzrə ixrac ötən ilin müvafiq dövrü ilə müqayisədə 70,6 milyon dollar və ya 16,4% artıb.
2021-ci ilin birinci rübü ərzində ixrac edilən qeyri-neft sektoruna aid malların siyahısında pambıq mahlıcı birinci olub. Bu siyahıda qızıl ikinci, xurma isə üçüncü yerdə qərarlaşıb.
Yanvar-mart ayıarı ərzində Türkiyəyə 163,1 milyon, Rusiyaya 129,8 milyon, İsveçrəyə 44,7 milyon, Gürcüstana 38 milyon, ABŞ isə 18,3 milyon dollar dəyərində qeyri-neft sektoruna aid mal ixrac olunub.
Mart ayında qeyri-neft sektoru üzrə ixrac 170 milyon dollar təşkil edib. 2021-cu ilin mart ayında qeyri-neft sektoruna aid ən çox mal ixrac edilən ölkələrin siyahısında Türkiyə 56,2 milyon dollar ilə liderliyini qoruyub. Bu siyahıda Rusiya ikinci (44,3 milyon dollar) və Gürcüstan üçüncü ( 9,7 milyon dollar) olub.
Bu ilin mart ayında ixrac edilən qeyri-neft sektoruna aid malların siyahısında pambıq mahlıcı (31,4 milyon dollar) birinci, polimerləşmə nəticəsində əmələ gələn ilkin formalı digər maddələr (13,7 milyon dollar) ikinci və qabığı təmizlənmiş meşə fındığı (9,7 milyon dollar) üçüncü olub.
Tətbiqimizi yükləyə bilərsiniz
