Agentlik Baş Prokurorluğun yaydığı məlumata etiraz etdi: "Doğru deyil..."

"Məmmədov Oruc Nüsrət oğlunun həbs edilməsi ilə bağlı yayılan məlumatlarda onun 7 saylı Tibbi-Sosial Ekspert Komissiyasının sədri kimi qeyd edilməsi doğru deyil".
Bu barədə Yeniavaz.com-a Əmək və Əhalinin Sosial Müdafiəsi Nazirliyi tabeliyində Dövlət Tibbi-Sosial Ekspertiza və Reabilitasiya Agentliyindən məlumat verilib.
"Çünki Oruc Məmmədov əmək funksiyalarının icrasında yol verdiyi kobud nöqsanlara görə hələ 26 oktyabr 2020-ci il tarixində Əmək Məcəlləsinin 70-ci maddəsinin “ç” bəndi ilə həmin komissiyanın sədri vəzifəsindən azad edilib. 6 ay əvvəl vəzifəsindən azad edilmiş şəxsin yenə də həmin vəzifədə olması kimi qələmə verilməsi əsassızdır və yolverilməzdir", - məlumatda bildirilib.
Xatırladaq ki, Məmmədov Oruc Nüsrət oğlunun həbs edilməsi ilə bağlı məlumatı Baş Prokurorluq yayıb və onu 7 saylı Tibbi-Sosial Ekspert Komissiyasının sədri kimi təqdim edib.