Bu ilin birinci rübündə İqtisadiyyat Nazirliyi yanında Dövlət Vergi Xidmətinin xətti ilə dövlət büdcəsinə 2 milyard 85,7 milyon manat vəsait daxil olub.
Yeniavaz.com açıqlanan rəsmi məlumatlara istinadən bildirir ki, bu da proqnoza nisbətən 363,8 milyon manat və ya 21,1%, 2020-ci ilin eyni dövrü ilə müqayisədə isə 45,8 milyon manat və ya 2,2% çoxdur.
Daxil olan vəsaitin 72,2%-i və yaxud 1 milyard 507 milyon manatı qeyri-neft sektorundan daxilolmaların payına düşür ki, bu da 2020-ci ilin eyni dövrü ilə müqayisədə 110,6 milyon manat və ya 7,9% çoxdur.
Məlumat üçün bildirək ki, ötən ilin birinci rübündən fərqli olaraq, bu ilin birinci rübündə koronavirus pandemiyası səbəbindən şadlıq evləri, iri ticarət mərkəzləri kimi bir sıra müəssisələr fəaliyyət göstərməyib.