Şəhriyar Məmmədyarov Levon Aronyana qalib gəlib, Teymur Rəcəbov heç-heçə edib - YENİLƏNİB

Onlayn şahmat üzrə Çempionlar turunun 4-cü mərhələsi start götürüb.

Dairəvi sistemlə keçirilən ilk mərhələnin 1-ci günündə 5 tur oynanılıb.

Azərbaycan qrossmeysterləri Şəhriyar Məmmədyarovla Teymur Rəcəbov da mübarizəyə qoşulub. Şahmatçılarımız hərəyə 5 matç keçirib.

İlk turda Ermənistanı tərk etsə də, hələ də bu ölkənin şərəfini qoruyan Levon Aronyanla görüşən Şəhriyar turnirə qələbə ilə başlayıb. O, rəqibini qara fiqurlarla məğlub edib. Ardınca Daniil Dubov (Rusiya) və Hikaru Nakamura (ABŞ) ilə heç-heçə edən Məmmədyarov Yorden Van Forrest (Niderland) üzərində qələbə qazanıb. Məmmədyarov günün son qarşılaşmasında Maksim Vaşye-Laqrava (Fransa) uduzaraq günü 3 xalla tamamlayıb.

Rəcəbov da erməni rəqibi ilə prinsipial görüşə ilk gündə çıxıb. Startda Aniş Giri (Niderland), Daniil Pişo (Argentina) və Uesli So (ABŞ) ilə heç-heçələrı sıralayan şahmatçımız ağ fiqurlarla oynadığı Aronyanla da xalı yarı bölüb. Teymur günün son matçında Daniil Dubova (Rusiya) qalib gəlib. 

İlk 5 turdan sonra Aniş Giri 4 xalla yarışın lideridir. Şəhriyar 3 xalla 4-cü, eyni xala malik Teymur isə 6-cıdır. 

Qeyd edək ki, növbəti 5 turun oyunları martın 14-də keçiriləcək.

I tur
Levon Aronyan (Ermənistan) – Şəhriyar Məmmədyarov - 0:1
Teymur Rəcəbov – Aniş Giri (Niderland) - 0,5:0,5

II tur
Şəhriyar Məmmədyarov – Daniil Dubov (Rusiya) - 0,5:0,5
Teymur Rəcəbov – Daniil Pişo (Argentina) - 0,5:0,5

III tur
Hikaru Nakamura (ABŞ) - Şəhriyar Məmmədyarov - 0,5:0,5
Uesli So (ABŞ) -Teymur Rəcəbov - 0,5:0,5

IV tur
Şəhriyar Məmmədyarov – Yorden Van Forrest (Niderland) - 1:0
Teymur Rəcəbov - Levon Aronyan (Ermənistan) - 0,5:0,5

V tur
Maksim Vaşye-Laqrav (Fransa) - Şəhriyar Məmmədyarov - 1:0
Daniil Dubov (Rusiya) - Teymur Rəcəbov - 0:1

***

Saat. 20:49

Azərbaycan şahmatçıları Şəhriyar Məmmədyarov və Teymur Rəcəbov dünya çempionu Maqnus Karlsenin təşkil etdiyi Çempionlar Turunun IV mərhələsində ilk görüşlərini keçirib.

Məmmədyarov "Magnus Carlsen Invitational" adlanan yarışın I turunda Ermənistan təmsilçisi Levon Aronyanla qarşılaşıb.

Qara fiqurlarla oynayan 36 yaşlı qrossmeyster rəqibini məğlub edib.

Rəcəbov isə turnirə heç-heçə ilə başlayıb. O, ilk turda Niderland şahmatçısı Aniş Giri ilə xalları yarı bölüb.

Qeyd edək ki, "Magnus Karlsen Invitational" Azərbaycan Şahmat Federasiyasının dəstəyi ilə "Report" İnformasiya Agentliyinin feysbuk və yutub səhifələrində canlı yayımlanır. İlk yarış günündə aparıcı, beynəlxalq qrossmeyster Vasif Durarbəylinin qonağı şahmat üzrə Azərbaycan yığmasının keçmiş üzvü Zeynəb Məmmədyarovadır.

Xatırladaq ki, turnirin ümumi mükafat fondu 220 min ABŞ dollarıdır. Qalib şahmatçı 60 000, finalçı 40 000, 3-cü yerin sahibi isə 25 000 ABŞ dolları qazanacaq. Yarış martın 21-də yekunlaşacaq. Teymur Rəcəbov Çempionlar Turunun II mərhələsində qalib, III mərhələsində isə 3-cü yerin sahibi olub. (report)