Tarix müəlliminin 50 illik maraqlı kolleksiyası - FOTOLAR

Almaz Məmmədovanın kolleksiyasında minə yaxın dəvətnamə var. Onlar arasında doğmalarının, onların övladlarının, hətta nəvələrinin dəvətnaməsi var.
Elimizin toy kimi gözəl adəti var. Amma koronavirus səbəbindən bir ildir həmin gözəl adətə həsrət qalmışıq. Geridə qoyduğumuz 12 ayda milli musiqimizi, dadlı təamlarımızı, bir sözlə, toy adətlərimizi dondurmuşuq. Qaydalara uyğun hərəkət edib, virusdan tezliklə yaxa qurtarmağa çalışırıq.
Almaz Məmmədova M.Hüseynzadə adına 3 saylı tam orta məktəbdə çalışır. Tarix müəllimi maraqlı hobbiləri  ilə diqqət çəkir. O, əlli ilə yaxındır dəvətnamə toplayır. Almaz Məmmədovanın kolleksiyasında 1970-ci ildən 2020-ci ilə qədər olan dövrü əhatə edən minə yaxın dəvətnamə var. Şəhər sakini deyir ki, onlar arasında öz doğmlarının, onların övladlarının, nəvələrinin, həmçinin məktəb kollektivinin toy dəvətləri var:
"Bu kolleksiyada həm ailəmizə aid olan, həmçinin qohumlarda, qonşularda olan toyların dəvətnamələri var. Həmişə mən müəllimlərimizə də deyirəm: "Məktəbimizin də tarixçəsi bu kolleksiyadadır". Bütün toy mərasimlərinin dəvətnaməsi var məndə. Belə hesab edirəm ki, mənim bu kolleksiyam bizim ailəmizin, nəslimizin bir tarixçəsidir artıq. Eləcə də çalışdığım kollektivin. Dəvətnamələri vərəqlədikcə, onları izlədikcə, elə bil ki, o ailələrin yaranması, davamı, inkişaf etməsi insanın gözünün qarşısına gəlir. Ona görə hesab edirəm ki, bu, bir tarixçədir.

Dəvətnamələr içərisində 1975, 1981, 1987-ci illərdə yazılanlar fərqli formaları ilə daha çox seçilir. Bəziləri ölçüsünə görə açıqcaları xatırladır. 1975-ci ilə aid dəvətnamə Almaz xanımın atasına rus qonşuları tərəfindən yazılıb:
"Rus vətəndaşı olan qonşularımız vardı, onlar atamı, anamı toya dəvət etmişdilər, onu da saxlamışam. Üstündən 46 il keçməsinə baxmayaraq həmin dəvətnamələr sanki bu gün yazılıb. Ötən illərdə dəvətnamə az-az verilərdi, daha çox varlı təbəqələr fərqli formalı dəvətnamələr çap etdirərdi. Sonralar açıqcalarda yazmağa başladılar. İllər keçdikcə həmin toya çağırış vasitələri də dəyişdi. İndiki müasir dəvətnamələri 70-80-ci illərdəkilərlə müqayisə edəndə ölçüsündə, dizaynında xeyli fərqlər görürük. Hazırda toylar dayandığından kolleksiyama dəvətnamələr də gəlmir. Dəvətnamə gəlmirsə, deməli, yeni ailələr də yaranmır. Arzu edək ki, bu pandemiya dövrü tez başa çatsın, elimizin adəti olan toylar da başlasın”.

Esmira Hidayətova, Mingəçevir