Paşinyan Qasparyanın vəzifəsindən çıxarılması haqqında yenidən Prezidentə təklif göndərib

Ermənistan Baş naziri Nikol Paşinyan Silahlı Qüvvələrin Baş Qərargah rəisi Onik Qasparyanın vəzifədən azad edilməsi barədə Prezidentə təkrar müraciət ünvanlayıb.
Yeniavaz.com xəbər verir ki, bu barədə Paşinyan özünün "facebook" səhifəsində məlumat verib. O bildirib ki, Qasparyanın baş qərargah rəisi vəzifəsindən çıxarılması haqqında yenidən Prezidentə təklif ünvanlayıb:
“Prezident Baş Qərargah rəisinin vəzifədən azad edilməsi barədə müraciəti geri qaytarmaq qərarına gəldi, bu, yaranmış vəziyyətin həllinə heç də kömək etmir. Mən Qasparyanın baş qərargah rəisi vəzifəsindən çıxarılması ilə bağlı yenidən Prezidentə təklif göndərirəm və onun müəyyən edilmiş qaydada imzalanacağını gözləyirəm”.
Qeyd edək ki, daha əvvəl Ermənistan Prezidenti Armen Sarkisyan öz konstitusiya səlahiyyətləri çərçivəsində Silahlı Qüvvələrin Baş Qərargah rəisi Onik Qasparyanın vəzifəsindən azad edilməsi haqqında qərarı Baş nazir Nikol Paşinyana geri qaytarıb.
Xatırladaq ki, fevralın 25-də Baş Qərargah Baş nazir Nikol Paşinyanın istefasını tələb edib. Buna cavab olaraq Baş nazir Nikol Paşinyan çevriliş cəhdini bəyan edib və Baş Qərargah rəisi Onik Qasparyanın vəzifəsindən azad olunması barədə qərar imzalayaraq, onu Prezidentə göndərib.