DİN maska cərimələrini Almaniya ilə müqayisə etdi: "Yüksək cərimə, 30 sutka həbs ..." - VİDEO

Pandemiya şəraitində hər bir şəxs izolyasiya qaydalarına, epidemiya əleyhinə rejimin, sanitariya-gigiyena və karantin qaydalarına əməl etməlidir.

Bu barədə Daxili İşlər Nazirliyinin (DİN) Mətbuat xidmətindən məlumat verilib.

Bildirilib ki, bu dövrdə fərdi qoruyucu vasitələrdən istifadə ilə bağlı müəyyən edilən tələblərə əməl edilməsi vətəndaşların sağlamlığına xidmət edir:

"Nə dövlət, nə polis kiminsə bu qaydaları pozmasına görə cərimələnməsində maraqlı deyil. Pandemiya şəraitində vətəndaşlarımız qaydalara ciddi əməl etməklə, özünü yaxınlarını, bütövlükdə cəmiyyəti bu bəladan qorumalıdır.

İnzibati cərimə çəkindirici xarakter daşıyır, inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədindən irəli gəlir. İndiki şəraitdə bu məsuliyyət hər birimizin həyat tərzi olmalıdır. Bir daha diqqətə çatdırırıq ki, xüsusi karantin rejiminə nəzarəti həyata keçirən polis əməkdaşlarının hansısa vətəndaşın cərimə edilməsində maraqlı deyil. Yetər ki, vətəndaşlar tibbi maskadan düzgün istifadə etsinlər.

Tək Azərbaycanda yox, dünyanın bütün ölkələrində pandemiya ilə əlaqədar hüquq normaları var. Bu hüquq normalarının təmin edilməsinə ciddi nəzarət olunur.

Bir sıra dövlətlər tərəfindən pandemiyanın geniş yayılmasının qarşısının alınmasında müəyyən edilən qaydaların yerinə yetirilməsi üçün daha sərt cəza tədbirləri həyata keçirir. Məsələn, tibbi maskalardan istifadə etməyən şəxslər Türkiyədə 219 manat, Almaniyada 307 manat, Böyük Britaniyada 235 manat, Fransada 276 manat, ABŞ-da 510 manatdan 550 manata qədər cərimlər tətbiq edilir. Elə ölkələr var ki, orada daha yüksək cərimələr olmaqla yanaşı, 30 sutka həbs qərarı olan hüquq normaları tənzimlənir.

Hər bir vətəndaşı bu qaydalara əməl etməyə çağırırıq. Qaydalara əməl edən vətəndaşlara isə təşəkkür edirik".

 

Yeniavaz.com region ölkələrində maska taxmaq tələbini pozmağa görə fiziki şəxslərə tətbiq olunan cərimələri təqdim edir:

ÖLKƏLƏR	CƏRİMƏLƏR
	MANAT	MİLLİ VALYUTA	ABŞ DOLLARI
Ukrayna	1 070 manat	17 000 qrivna	630 dollar
Türkiyə	225 manat	900 lirə	132 dollar
Azərbaycan	100 manat	100 manat	59 dollar
Rusiya	95 manat	4 000 rubl	56 dollar
Qazaxıstan	59 manat	14 000 tengə	35 dollar
Ermənistan	35 manat	10 000 dram	20 dollar
Qırğızıstan	22 manat	1 000 som	13 dollar
Gürcüstan	11 manat	20 lari	6,5 dollar

Onu da bildirək ki, Azərbaycan region ölkələrində 3 qatlı və simli tibbi maskanın orta qiymətini görə orta sıralarda qərarlaşıb. 

ÖLKƏLƏR	MANAT	MİLLİ VALYUTA	ABŞ DOLLARI
İran	9 qəpik	800 tümən	5 sent
Türkiyə	25 qəpik	1 lirə	15 sent
Gürcüstan	28 qəpik	0,5 lari	16 sent
Azərbaycan	30 qəpik	30 qəpik	18 sent
Qazaxıstan	34 qəpik	80 tengə	20 sent
Rusiya	37 qəpik	15 rubl	22 sent
Belarus	42 qəpik	0,60 rubl	25 sent
Ermənistan	42 qəpik	120 dram	25 sent
Ukrayna	50 qəpik	8 qrivna	30 sent