Ermənistan müharibədə PKK və ASALA-dan dəstək alıb - BMT Baş katibinə hesabat

Azərbaycanın BMT yanında daimi nümayəndəliyi Ermənistanın Azərbaycana qarşı son hücumlarında əcnəbi terrorçulardan istifadə etməsi ilə bağlı hesabatı BMT Baş katibinə ünvanlayıb.
Yeniavaz.com APA-ya istinadla xəbər verir ki, hesabatda Ermənistan hökumətinin əcnəbi terrorçuları Azərbaycana qarşı terror və döyüş əməliyyatlarına hazırlamaq üçün onları işğal altında olan ərazilərdə yaşayış yeri, təlim və maddi-texniki təchizatla təmin etdiyi bildirilib.
Diqqətə çatdırılıb ki, PKK və ASALA terror təşkilatlarının təlimatı ilə bu terrorçular üçün təlim düşərgələri təşkil olunub.
Hesabatda qeyd olunub ki, Ermənistanın 27 sentyabr 2020-ci il tarixində növbəti təcavüz aktını törətməsindən dərhal sonra əcnəbi terrorçuların köçürülməsi daha da sürətlənib.
Hesabatda kəşfiyyat və media mənbələrindən əldə olunan fakt və məlumatlar əksini tapıb.
BMT Baş katibinə ünvanlanan hesabatda Ermənistan tərəfindən döyüşlərə cəlb olunan əcnəbi terrorçuların adları, onların hansı təşkilat və qruplardan olmaları, hansı ölkələrdən gətirilmələri, təlim və yerləşdimə prosesi, bu terrorçulara ödənilən ödənişlərlə bağlı faktlar və məlumatlar yer alıb.