Aİ Dəniz Qüvvələri “İrini əməliyyatı”nın Türkiyədən iznsiz aparıldığını etiraf etdi - Türkiyədən nota - YENİLƏNİB

Avropa İttifaqı Dəniz Qüvvələri “İrini əməliyyatı”nın Türkiyənin icazəsi olmadan aparıldığını etiraf edib.

Bu barədə “Anadolu Agentliyi” məlumat yayıb.  Qeyd edək ki, Avropa İttifaqı Dəniz Qüvvələri tərəfindən BMT-nin Liviyaya silah məhdudiyyətləri tətbiq etmək məqsədi ilə 31 mart 2020-ci ildən Aralıq dənizində “İrini” Hərəkatına başlanılıb. Ancaq bir çoxları “İrini”ni qərəzli əməliyyat sayır. 
Türkiyə Xarici İşlər Nazirliyi Almaniya, İtaliya və Avropa İttifaqına nota verib. Türkiyə Xarici İşlər Nazirliyinin (XİN) yaydığı məlumatda deyilir ki, Avropa İttifaqının, İtaliyanın Ankaradakı səfiri və Almaniyanın Ankaradakı müvəqqəti işlər vəkili (Almaniyanın Türkiyədəki səfiri Ankaradan kənarda olduğu üçün) Türkiyənin Xarici İşlər nazirinin müavini Sedat Önal tərəfindən XİN-ə çağırılıb.

“Türkiyənin açıq icazəsi olmadan bizə məxsus “Roseline A” ticarət gəmisinə “İrini əməliyyatı” çərçivəsində minib axtarış aparılması hadisəsinə etiraz edilib. Bununla bağlı əlaqədar ölkələrə nota verilib. Notada hadisənin beynəlxalq hüquqa zidd olduğu və təzminat hüquqlarımızın da qorunduğu qeyd edilib”, deyə açıqlamada bildirilib. 

Xatırladaq ki, dünən Aralıq dənizi vasitəsilə Liviyaya ərzaq, boya və bu kimi məhsullar aparan Türkiyəyə məxsus ticarət gəmisində kapitanı yunan olan Almaniyaya məxsus “Hamburq” gəmisinin hərbi heyəti beynəlxalq dəniz qanunlarına zidd olaraq axtarış aparıb.