Sərhədsiz Reportyorlar Təşkilatı (Reporters Without Borders -RWB) 2020-ci il üçün "Dünya Mətbuat Azadlığı İndeksi" ("World Press Freedom Index-2020") adlı yeni hesabatını açıqlayıb.
Yeniavaz.com açıqlanan hesabata istinadən bildirir ki, Azərbaycanın 180 ölkə arasındakı mövqeyi son bir ildə 2 pillə pisləşib. Ötən il 180 ölkə arasında 166-cı sırada yer alan Azərbaycan bu il 168-ci sıraya geriləyib. Məlumat üçün qeyd edək ki, hesabatda yer alan ölkələrdə mətbuat azadlığının vəziyyəti 0-100 bal arasında qiymətləndirilir:
0-15 bal arası qiymət alan ölkələrdə mətbuatın vəziyyəti "yaxşı" ("ağ"),
15-25 bal arası qiymət alan ölkələrdə mətbuatın vəziyyəti "nisbətən yaxşı" ("sarı"),
25-35 bal arası qiymət alan ölkələrdə mətbuatın vəziyyəti "problemli" ("narıncı"),
35-55 bal arası qiymət alan ölkələrdə mətbuatın vəziyyəti "pis" (qırmızı"),
55-100 bal arası qiymət alan ölkələrdə mətbuatın vəziyyəti "çox pis" ("qara")
Sərhədsiz Reportyorlar Təşkilatı ötən il oduğu kimi 2020-ci ildə də mətbuat azadlığı sahəsində Azərbaycanın vəziyyətini "çox pis" olaraq qiymətləndirib. 2019-ci il hesabatında 59,1 bal toplayan Azərbaycanın bu il 58,1 bal toplayıb.
Onu da qeyd edək ki, keçmiş SSRİ və region ölkələri arasında mətbuat azadlığının vəziyyəti Azərbaycanla müqayisədə yalnız İran (173-cü yer) və Türkmənistanda (179-cu yer) daha pis olub.
Keçmiş SSRİ və region ölkələri arasında mətbuat azadlığı sahəsində ən yaxşı vəziyyət Estoniya (14-cü yer), Latviya (22-ci yer), Litva (28-ci yer) və Gürcüstanda (60-cı yer) qeydə alınıb. Ermənistan 61-ci yer, Qırğızıstan 82-ci yer, Moldova 91-ci yer, Ukrayna 96-cı yer, Rusiya 149-cu yer, Belarus 153-cü yer, Türkiyə 154-cü yer, Özbəkistan 156-cı yer, Qazaxıstan 157-ci yer, Tacikistan 161-ci yer.
Ümumilikdə isə mətbuat azadlığı sahəsində ən yaxşı vəziyyət Norveç, Finlandiya, Danimarka, İsveç və Niderlanda məxsus olub. Ən pis vəziyyət isə Şimali Koreya, Türkmənistan, Eritreya, Çin və Cibutidə qeydə alınıb.