"Bild": "Hər kəsi izləyirsiniz, ancaq yarasa şorbasının satıldığı yerləri görmürsünüz?!" - VİDEO

Almaniyanın "Bild" qəzetinin yazarı Culian Reyhelt Çin rəhbəri Si Tsinpinə açıq məktubla müraciət edib. Yeniavaz.com xəbər verir ki, jurnalist 5 əsas maddə ilə Çini və birbaşa Tsinpini hal-hazırda dünyada yaşanan koronavirus fəlakətinin əsas səbəbkarı kimi göstərir. Həmin müraciəti həm mətn, həm də video şəklində sizə təqdim edirik:
"Hörmətli Prezident Si Tsinpin Berlindəki səfirliyiniz mənə açıq bir məktubla müraciət etdi, çünki biz "Bild" qəzeti olaraq Çinin dünya miqyasında koronavirusunun vurduğu böyük iqtisadi ziyana görə pul ödəyib-ödəməyəcəyini soruşduq. Cavab verim:
1. Hakimiyyətinizin əsası, hər şeyi, hər kəsi izləməkdir. Siz nəzarət, izləmə, təqib olmadan Prezident ola bilməzsiniz. Hər şeyi, hər bir vətəndaşı izləyirsiniz, ancaq ölkənizdəki xəstəlik mənbəyi bazarları izləməkdən imtina edirsiniz. Hakimiyyətinizi tənqid edən hər qəzeti və veb saytı bağlayırsınız, ancaq yarasa şorbasının satıldığı yerləri görmürsünüz. Siz yalnız xalqınızı izləmirsiniz, onlarla birlikdə, dünyanın qalan hissəsini təhlükə altına atırsınız.
2. İnsanları bu qədər təqib etmək, azadlığın rədd edilməsidir. Azad olmayan xalq yaradıcı ola bilməz. Yenilikçi olmayan bir xalq heç bir şey icad edə bilməz. Buna görə də, ölkənizi intellektual mülkiyyət oğurluğu üzrə dünya çempionu etmisiniz. Çin öz-özünə icad etmək əvəzinə başqalarının ixtiraları ilə zənginləşir. Çinin yenilik etməməsi və icad etməməsinin səbəbi, ölkənizdəki gənclərin sərbəst düşünməsinə imkan verməməyinizdir. Çinin ən böyük ixracat zərbəsi - heç kimin istəmədiyi, lakin buna baxmayaraq dünyanın hər tərəfinə gedib çıxması - "Korona"dır.
3. Siz, hökumətiniz və alimləriniz "Korona"nın yüksək yoluxucu olduğunu çoxdan bilməli idiniz, ancaq dünyanı qaranlıqda qoydunuz, məlumat vermədiniz. Qərb tədqiqatçıları Uhanda nələrin baş verdiyini bilmək istədikdə sizin yüksək rütbəli mütəxəssisləriniz cavab vermədi. Milli rüsvayçılıq hiss etdiyiniz həqiqəti söyləmək üçün çox qürurlu və çox millətçi idiniz.
4. "Washington Post" xəbər verir ki, Uhandakı laboratoriyalarınız, yüksək təhlükəsizlik standartları olmadan, yarasalardakı koronaviruslar üzərində tədqiqat aparıblar. Niyə zəhərli laboratoriyalarınız siyasi məhbuslar üçün həbsxanalarınız qədər təhlükəsiz deyil? Bunu bütün dünyada "Korona" qurbanlarının kədərli dul qadınlarına, qızlarına, oğullarına, ərlərinə, valideynlərinə izah etmək istərdinizmi?
5. Ölkənizdə, xalqınız sizin haqqınızda pıçıldayır. Gücünüz çökür. İnsafsız, şəffaf olmayan Çin yaratdınız. "Korona"dan əvvəl Çin nəzarət-izləmə dövləti kimi tanınırdı. İndi Çin dünyanı ölümcül bir xəstəliklə yoluxduran bir nəzarət-izləmə dövləti olaraq tanınır. Bu sizin siyasi mirasınızdır. Səfirliyiniz mənə deyir ki, mən "xalqlarımızın ənənəvi dostluğuna" uyğun deyiləm. Güman edirəm ki, indi dünyaya səxavətlə maskalar göndərdiyiniz zaman bunu böyük "dostluq" hesab edirsiniz. Bu dostluq deyil, bu "Troya atı" gülüşü arxasına gizlənmiş imperializmdir. Çini ixrac etdiyiniz vəba ilə gücləndirməyi planlaşdırırsınız. Müvəffəq olmayacaqsınız. "Korona" gec-tez siyasi sonunuz olacaq. Hörmətlə Julian Reichelt"