Məlum olduğu kimi, koronavirus pandemiyasının Azərbaycan iqtisadiyyatına, makroiqtisadi sabitliyə, məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı Nazirlər Kabineti tərəfindən Tədbirlər planı təsdiq olunub.
Yeniavaz.com xəbər verir ki, Tədbirlər planında işsiz kimi qeydiyyata alınan şəxslərə yaşayış minimumu həcmində (190 manat) birdəfəlik ödəmənin verilməsi də nəzərdə tutulub. Belə ki, işsiz kimi qeydiyyata alınan şəxslərə aprel-may aylarında hər ay üçün yaşayış minimumu həcmində – 190 manat birdəfəlik ödəmə veriləcək.
Maraqlıdır ki, 190 manat bir nəfər üçün nəzərdə tutulan yaşayış minimumu olsa da bu məbləğ ailədən yalnız bir nəfərə verilir və ailənin digər işsiz üzvlərinə şamil edilmir. Yəni əgər ailədə həm ər, həm də arvad işsizdirsə onlardan yalnız birinə 190 manat müavinət veriləcək. Koronavirus pandemiyası səbəbində evdən çıxmlaraına məhdudiyyət qoyulan bu şəxslərin sosial müdafiəsinin necə təmin olunacağı barədə hələ ki, rəsmi qurumlardan heç bir açıqlama verilməyib.
Məlumat üçün bildirək ki, “Yaşayış Minimumu Haqqında” Qanunda yaşayış minimumunun “Minimum istehlak səbəti”nin dəyəri və icbari ödənişlərin cəmindən ibarət sosial norma olduğu göstərilir. “Minimum istehlak səbəti” isə insanın sağlamlığının və həyat fəaliyyətinin minimum səviyyəsi üçün zəruri olan ərzaq, qeyri-ərzaq malları və xidmətlərin elmi normalar əsasında müəyyən edilmiş toplusudur.
Buradan belə görünür ki, yaşayış minimum yalnız bir insana imkan verir ki, o, öz sağlamlığını və həyat fəaliyyətinin minimum səviyyədə təmin edə bilsin.
Bəs görəsən, ailədə işləməyən iki nəfər - ər və arvad 190 manata necə dolana bilərlər?
Bildiyimiz kimi, kimi ölkədə “Minimum istehlak səbəti”nin tərkibi sonuncu dəfə Nazirlər Kabinetinin 6 iyun 2014-cü il tarixli qərarı ilə müəyyən edilib.
Həmin qərara görə, bir insanın sağlamlığını və həyat fəaliyyətini minimum səviyyədə təmin edə bilməsi üçün aşağıdakı cədvəldə qeyd olunan ərzaq, qeyri-ərzaq malları və xidmətlərdən istifadə etməsi zəruridir.
| Məhsullar və xidmətlərin adı | Minimum aylıq norma |
Vahidin qiyməti | Yekun qiymət |
| Çörək və çörək məhsulları (una çevirməklə) | 11.4 kq | 0.6 azn | 6.8 azn |
| Kartof | 4.6 kq | 0.9 azn | 4.1 azn |
| Tərəvəz və bostan məhsulları | 8.1 kq | 1.5 azn | 12.1 azn |
| Meyvə və giləmeyvə | 3.2 kq | 2 azn | 6.4 azn |
| Ət və ət məhsulları | 2.7 kq | 11 azn | 29.7 azn |
| Süd və süd məhsulları (südə çevirməklə) | 18.6 kq | 1.8 | 33.5 azn |
| Balıq və balıq məhsulları | 0.64 kq | 8 azn | 5.1 azn |
| Yumurta (ədəd) | 13 ədəd | 0.2 azn | 2.6 azn |
| Şəkər və qənnadı məmulatları | 1.4 kq | 3 azn | 4.2 azn |
| Bitki yağı, marqarin və digər piylər | 0.9 kq | 3 azn | 2.7 azn |
| Kərə yağı | 0.58 kq | 15 azn | 8.7 azn |
| Digər ərzaq məhsullar | 0.39 kq | 2 azn | 0,8 azn |
| Su | 5 kub metr | 0.35 | 1.75 azn |
| Kanalizasiya | 5 kub metr | 0.15 | 0.75 azn |
| Qaz təchizatı | 21 kub metr | 0.1 azn | 2.1 azn |
| Enerji təchizatı | 50 kVt-saat | 0.07 azn | 3.5 azn |
| Rabitə | ay | 2,5 | 2,5 azn |
| İnternet xidmətləri | ay | 15 | 15 azn |
| Digər xidmətlər | xərclərin 15%-i | - | 3.8 azn |
| Sabun, şampun, qab təmizləyici, dərmanlar və s. | 10 azn | ||
| CƏMİ | 166.1 |
Onu da qeyd edək ki, karantin dövründə insanların evdə olacağını nəzərə alaraq qeyd olunan cədvəldə “Minimum istehlak səbəti”nə daxil olan bir sıra xərclər – geyim, nəqliyyat və s. göstərilməyib. Rəqmlərdən də göründüyü kimi evdən çıxmayan bir şəxsin minimium xərcləri 166 manat edir. Rabitə və internet kimi bəzi xidmətlərdən birgə istifadə etdiklərini nəzərə alsaq ailədə iki nəfərin - ər və arvadın minimum xərcləri üçün ən azı 300 manat lazımdır. Göründüyü kimi ayrılan 190 manatlıq yardım ailənin minimum tələblərini belə ödəmir.
A. Cəfərov
Tətbiqimizi yükləyə bilərsiniz
