Daxili İşlər Nazirliyi repçi Pərviz Quluzadənin saxlanılmasına aydınlıq gətirib.  

Yeniavaz.com xəbər verir ki, nazirliyin mətbuat xidmətinin rəisi Ehsan Zahidov APA-nın sorğusuna cavab olaraq ötən gün P.Quluzadənin Binəqədi rayonu ərazisində narkotikin təsiri altında ictimai asayişi və ictimai qaydanın pozulmasına yönəlik hərəkətlər edərkən polis əməkdaşlarının onu intizama dəvət etdiyini bildirib.

Lakin o, polisin qanuni tələblərinə tabe olmayıb. Bundan sonra o polis tərəfindən saxlanılaraq barəsində toplanmış materiallar Binəqədi Rayon Məhkəməsinə göndərilib. 

Binəqədi rayon Məhkəməsi tərəfindən P.Quluzadə İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələbinə tabe olmamaq) maddələri ilə təqsirli bilinərək barəsində 30 sutka həbs qərarı çıxarılıb.

Qeyd edək ki, repçi Paster ləqəbi ilə tanınır.