Ermənilər Azərbaycan PUA-sını vurublar? - Müdafiə Nazirliyindən AÇIQLAMA

Ermənistan mətbuatında Azərbaycana məxsus Pilotsuz Uçuş Aparatının (PUA) təmas xəttinin Ağdam istiqamətində vurulduğu barədə məlumat yayılıb.
Yeniavaz.com Ermənistan KİV-lərinə istinadən bildirir ki, vurulan PUA-nın İsrail istehsalı olan "ORBITER-2" olduğu qeyd olunub.
Məlumatda qeyd olunur ki, son 8 ildə Azərbaycan Silahlı Qüvvələrinə məxsus 22 pilotsuz uçan aparat vurulub.
Azərbaycan Müdafiə Nazirliyindən mətbuata verilən açıqlamada isə bildirilib ki, bu xəbər həqiqətə uyğun deyil. "Azərbaycan Ordusunun bölmələrinə məxsus PUA-lar tam tərkibdə sıradadır və itki yoxdur", - deyə məlumatda qeyd edilib.
Məlumat üçün bildirək ki, İsrail istehsalı olan və Azərbaycan Silahlı Qüvvələrinin istifadəsində olan "ORBITER-2" PUA-ları hərbi və daxili təhlükəsizlik tapşırıqlarının yerinə yetirilməsi üçün layihələndirililib. Sistem kiçik münaqişələrdə müxtəlif kəşfiyyat tapşırıqlarının həyata keçirilməsi üçün nəzərdə tutulub.
Əsas texniki göstəriciləri bunlardan ibarətdir:

Ölçüləri:

- Qanadlarının uzunluğu - 3 metr
- Uznluğu - 1 metr

Texniki göstəriciləri:

- Çəkisi - 8,5 kq
- Faydalı yük götürmə imkanı  - 1,5 kq
-Uçuş məsafəsi  - 80 km
- Uçuş müddəti  - 4-5 saat
- Yüksəklik  - 6 km
- Uçuş surəti  - 70 km/s