Oğuzda bir neçə gündür meşə yanğını tüğyan edir. Hazırda Fövqəladə Hallar Nazirliyinin (FHN) canlı qüvvəsi, eləcə də yanğınsöndürmə bölmələri və kənd camaatı əraziləri amansız alovun pəncəsindən azad etmək üçün mübarizə aparmaqdadırlar.
Yanğının söndürülməsində FHN-in canlı qüvvəsi ilə yanaşı, bir amfibiya təyyarəsi və helikopterləri cəlb olunub.
Oğuz sakini Dağlar Mehdiyev olanları belə izah edir: "Alovun kəndə yaxınlaşmaması üçün mübarizə aparırıq. Güclü tüstü həm ev heyvanlarına, mal-qaraya, həm də insanlara çətinlik yaradır. Hətta həkimə müraciət edənlər də var".
Ərazinin əksər hissəsinin dağlıq, meşələrin sıx keçilməz olması insanların işləməsinə əngəl yaratdığı üçün əsasən helikopterlərdən və təyyarələrdən istifadə olunur. Tüstü canlılarla yanaşı, texnikanın işinə də ciddi təsir göstərir. Belə ki, tüstülü havada görüntü məsafəsinin qısalması yanğınla mübarizədə çətinlik yaradır. Hazırda güclənən külək də yanğının genişlənməsinə öz "töhfə"sini verir.
Xaçmaz kənd sakini Fuad İsayev yanğın səbəbindən meşə heyvanlarının məcburən kəndə endiyini deyir: "Gecələr kəndlərdə tülküyə, çaqqala, cüyürə, canavara, qırqovula rast gəlmək olar. Özü də sayları xeylidir. Təbii ki, vəhşi heyvanlarla qarşılaşmaq ehtimalı insanları qorxudur".
Hazırda Oğuz rayonunun Xaçmaz, Daşağıl, Ovcullu və digər sərhəd kəndlərinin meşələri yanmaqdadır.
Sputnik.az
Tətbiqimizi yükləyə bilərsiniz
