Gürcüstanın Kutaisi həbsxanasında İsrail vətəndaşı ölüb.
Bu barədə məlumatı Gürcüstan Xüsusi Penitensiar xidməti yayıb.
Bildirilib ki, saxlanılan şəxs bir neçə gün öncə İsrail dövlətinin tələbinə əsasən saxlanılıb.
“Ölən şəxs 1958-ci il təvəllüdlü İsrail vətəndaşıdır. Gürcüstan polisi onu bir neçə gün əvvəl İsrail dövlətinin tələbi əsasında həbs edib. Həbs edilməsindən sonra ekstradisiya prosesinə başlanılıb. İsraildə təcavüz etməkdə ittiham edilən şəxs 3 avqust 2019-cu il tarixdə 2 saylı cəzaçəkmə müəssisəsinə yerləşdirilib", - deyə açıqlamada deyilir.
Saxlanılan şəxsin avqustun 6-da tibbi yoxlanışı zamanı səhhətində heç bir problem aşkarlanmadığı və tibbi yardıma ehtiyac duymadığı bildirilib.
Qeyd olunub ki, sözügedən İsrail vətəndaşı avqustun 7-də cəzaçəkmə müəssisəsində olduğu vaxt həkimə müraciət edib. Həkimin qeydinə görə, müttəhimə nevrotik diaqnoz qoyulub. Ona bir dəfə sedativ dərman verilib və planlı kardioloq məsləhətləşməsi tövsiyə edilib. Lakin avqustun 11-də saat 08: 27-də məhbus yoldaşı tərəfindən huşsuz vəziyyətdə tapılıb. Səhər saat 08:30-da növbətçi həkim onun öldüyünü elan edib.
Faktla bağlı İsrailin Gürcüstandakı konsulluğu məlumatlandırılıb. Həmçinin Gürcüstan Ədliyyə Nazirliyinin İstintaq İdarəsinin Qərb şöbəsi tərəfindən cinayət məcəlləsinin 116 (1) maddəsi ilə istintaq başlanılıb.//APA