Bu ilin ilk 3 ayı ərzində turizm məqsədiə Azərbaycana 552 min 902 nəfər əcnəbi səfər edib. Ölkəyə gələn turistlərin 40%-i və ya 220 min 905 nəfəri otel və otel tipli yerlərdə qalıb.
Yeniavaz.com açıqlanan rəsmi statistikaya istinadən bildirir ki, turizm məqsədilə Azərbaycana gələnlərin yarıdan çoxu otellərdə qalmayıb.
Otellərdə qalmayan turistlərin böyük əksəriyyəti əsasən keçmiş post-sovet ölkələrindən və qonşu ölkələrdən gələnlər olub.
Açıqlanan rəsmi məlumatdan belə görünür ki, Azərbaycana gələn xarici ölkə vətəndaşlarının böyük əksəriyyəti 4 ölkədən - Rusiya, Gürcüstan, İran və Türkiyədən təşrif gətirir. Bu ilin ilk 3 ayında Azərbaycana gələn turistlərin 75%-i və ya 413 min nəfəri adları qeyd olunan 4 ölkədən gəlib.
Maraqlıdır ki, bu ölkələrdən gələn 413 min nəfərin yalnız 14%-i və ya 57 min nəfəri otellərdə qalıb. Məsələn, bu ilin ilk 3 ayında qonşu Gürcüstandan Azərbaycana gələn 146 min 168 nəfər turistin cəmi 1,6%-i və ya 2 min 419 nəfəri otellərə yerləşdirilib.
Digər ölkələrdən gələn turistlər arasında bu cür mənzərə qeydə alınmayıb. Tam əksinə otellərdə qalanların sayı ölkəyə gələn turistlərin sayından çox olub. Məsələn, bu ilin ilk 3 ayında Birləşmiş Ərəb Əmirliklərindən ölkəyə 20 min 581 nəfərin gəldiyi bildirilir. Halbuki ilk 3 ay ərzində otellərdə 32 min 494 nəfər Birləşmiş Ərəb Əmirlikləri vətəndaşının qaldığı qeyd olunub.
Bu cür qəribə statistikanın necə ortaya çıxdığı barədə rəsmi açıqlama verilmir. Eyni zamanda Azərbaycana gələn xarici ölkə vətəndaşlarının milli mənsubiyyəti də açıqlanmır. Yalnız ehtimal etmək olur ki, belə bir mənzərənin yaranmasının əsas səbəbi Rusiya, Gürcüstan, İran və Türkiyədən Azərbaycana gələn turistlərin əslində həmin ölkələrin vətəndaşı olan azərbaycanlılardan ibarət olmasıdır. Bu şəxslər daha çox qohumlarının evlərində yaşayıralar. Bu həm də o deməkdir ki, ölkəyə gələnlərin əksəriyyətini xarici ölkə vətəndaşı olan soydaşlarımız təşkil edir.
Bu ilin ilk 3 ayında Azərbaycana gələn turistlər və otellərdə qalanların bəzi ölkələr üzrə göstəriciləri aşağıdakı kimi olub:
| Ölkələr | Turistlərin sayı |
Otellərdə qalanlar |
| Yaponiya | 686 nəfər | 657 nəfər |
| ABŞ | 2 min 920 nəfər | 5 min 31 nəfər |
| Küveyt | 6 min 200 nəfər | 8 min 796 nəfər |
| Qətər | 2 min 111 nəfər | 4 min 939 nəfər |
| B.Ərəb Əmirlikləri | 20 min 581 nəfər | 32 min 494 nəfər |
| Oman | 4 min 311 nəfər | 2 min 601 nəfər |
| Fransa | 1 366 nəfər | 1 783 nəfər |
| İtaliya | 1 928 nəfər | 3 min 241 nəfər |
| B. Britaniya | 5 min 487 nəfər | 8 min 372 nəfər |
| S. Ərəbistanı | - | 11 min 709 nəfər |
| Almaniya | 2 min 566 nəfər | 2 min 423 nəfər |
| İsrail | 3 min 310 nəfər | 4 min 772 nəfər |
| Hindistan | 9 min 698 nəfər | 11 min 276 nəfər |
| Gürcüstan | 146 min 168 nəfər | 2 min 419 nəfər |
| Rusiya | 148 min 920 nəfər | 24 min 265 nəfər |
| Türkiyə | 62 min 152 nəfər | 15 min 849 nəfər |
| İran | 55 min 765 nəfər | 14 min 534 nəfər |
| Ukrayna | 10 min 182 nəfər | 2 min 875 nəfər |
| Qazaxıstan | 7 min 168 nəfər | 2 min 789 nəfər |
| Türkmənistan | 7 min 235 nəfər | 1 min 85 nəfər |
Tətbiqimizi yükləyə bilərsiniz
