İnstitutda Xocalı faciəsinin 27-ci ildönümü ilə bağlı anım mərasimi keçirilib

Bitki Mühafizə və Texniki Bitkilər Elmi Tədqiqat İnstitutunda (BM və TB ETİ) Xocalı faciəsinin 27-ci ildönümü ilə bağlı anım mərasimi keçirilib.
Tədbirdə əvvəlcə faciə qurbanlarının əziz xatirəsi bir dəqiqəlik sükutla yad edilib. Tədbiri giriş sözü ilə açan BM və TB ETİ-nin direktoru Vüqar Bəşirov 1992-ci il fevralın 25-dən 26-na keçən gecə ermənilərin Xocalıda törətdikləri soyqırımdan danışıb. O bildirib ki, Xocalı faciəsi ilə bağlı Azərbaycanda və xarici ölkələrdə müxtəlif təbliğat kampaniyaları, yığıncaqlar, aksiyalar keçirilir. Artıq dünyanın bir sıra ölkələrinin parlamentləri Xocalı soyqırımını tanımışdır.
Çıxış edən natiqlər tarix boyu Azərbaycan xalqının başına gətirilən faciələrdən danışmış, Xocalı soyqırımını dünyaya tanıtmağın hər bir azərbaycanlının müqəddəs borcu olduğunu vurğulamışlar.
Tədbirin sonunda Aqrar İnkişaf Könüllülərinin iştirakı ilə Xocalı Soyqırımı ilə bağlı ədəbi-bədii kompozisiya nümayiş etdirilmişdir.