Avropa İttifaqı (Aİ) Rusiyaya qarşı yeni – 23-cü sanksiya paketinin hazırlanmasına başlayıb.
Yeniavaz.com xəbər verir ki, bu barədə “Politico” nəşri müzakirələrlə tanış olan Ukrayna mənbələrinə istinadən məlumat yayıb.
Yeni məhdudiyyətlərin əsasən Rusiyanın neft gəlirlərinin azaldılmasına yönələcəyi gözlənilir.
Məlumata görə, yeni sanksiyalar paketinin layihəsinin 2026-cı ilin sonuna qədər Aİ üzv dövlətlərinə təqdim edilməsi planlaşdırılır.
Bundan əlavə, oktyabrın 15-də keçiriləcək Aİ sammitində iştirakçıların Rusiyanın enerji ehtiyatlarına qarşı əlavə məhdudiyyətlərin tətbiqini tələb etməyi nəzərdə tutduqları bildirilir.
Nəşrin yazdığına görə, Aİ-nin Rusiyanın neft sektoruna qarşı yeni sanksiyalar hazırlamaq qərarı ABŞ Prezidenti Donald Trampın Rusiya Prezidenti Vladimir Putinlə dizel yanacağının tədarükü məsələsində razılığa gəldiyini açıqlamasından sonra gündəmə gəlib.
Xatırladaq ki, oktyabrın 9-da Donald Tramp Vladimir Putinlə ABŞ və qlobal bazarlara Rusiya dizel yanacağının tədarükü ilə bağlı razılığa gəldiyini bəyan edib. Bu addım bir sıra Avropa siyasətçilərinin tənqidinə səbəb olub. Onlar Rusiyaya qarşı təzyiqlərin azaldılmamalı, əksinə, artırılmalı olduğunu bildiriblər.
Oktyabrın 12-də isə Avropa İttifaqı Rusiyaya qarşı 22-ci sanksiya paketini təsdiqləyib. Məlumata əsasən, həmin paket çərçivəsində sanksiya siyahısına təxminən 1 600 fiziki və hüquqi şəxs əlavə edilib. Bu, sanksiya siyahısının ən genişmiqyaslı genişləndirilməsi kimi təqdim olunub.
Aİ-nin xarici işlər və təhlükəsizlik siyasəti üzrə ali nümayəndəsi Kaja Kallas bildirib ki, siyahıya ballistik raketlərin istehsalında iştirak edən şəxslər də daxil edilib.
Tətbiqimizi yükləyə bilərsiniz
