ABŞ Prezidenti Donald Tramp bir sıra Yaxın Şərq ölkəsi və Pakistan liderləri ilə telefon danışığı zamanı onları Vaşinqton və Tehran sülh razılaşmasına nail olarsa, İsrail ilə münasibətlərin normallaşdırılmasına dair “İbrahim Sazişləri”nə qoşulmağa çağırıb.
Yeniavaz.com xəbər verir ki, bu barədə “Axios” portalı iki ABŞ rəsmisinə istinadla məlumat yayıb.
Portalın məlumatına görə, 23 mayda Bəhreyn, Misir, İordaniya, Qətər, BƏƏ, Pakistan və Səudiyyə Ərəbistanı liderləri ilə telefon danışığı zamanı Amerika lideri İran münaqişəsinin bitməsindən sonra “İbrahim Sazişləri”nin tərəfi olmayan və ya İsraillə sülh müqaviləsi olmayan ölkələrin Təl-Əvivlə münasibətlərini normallaşdıracağına ümid etdiyini bildirib.
Məlumatda qeyd olunur ki, İsraillə diplomatik münasibətləri olmayan Qətər, Pakistan və Səudiyyə Ərəbistanının nümayəndələri Trampın xahişini təəccüblə qarşılayıblar.
“Telefonda sükut çökdü və Tramp zarafatla hamının hələ də xətdə olub-olmadığını soruşdu”, - deyə rəsmilərdən biri ”Axios”a bildirib. Amerika lideri qeyd edib ki, prezidentin xüsusi elçisi Stiv Uitkoff və sahibkar Cared Kuşner qarşıdakı həftələrdə bu ölkələrlə İsrail arasında münasibətlərin normallaşdırılması üzərində işləyəcəklər.
Qeyd edək ki, ABŞ Prezidenti daha əvvəl “Truth Social”da İranın gələcəkdə “İbrahim Sazişləri”nə qoşulmaq istəyə biləcəyini etiraf etmişdi.
Xatırladaq ki, “İbrahim Sazişləri” 2020-2021-ci illərdə ABŞ-min vasitəçiliyi ilə İsrail və bəzi ərəb ölkələri tərəfindən əldə edilib. 2020-ci ildə Bəhreyn, Mərakeş və BƏƏ İsraillə münasibətləri normallaşdırıb. 2021-ci ildə Sudan yəhudi dövləti ilə diplomatik münasibətlər qurduğunu elan edib. Bu sazişlərdən əvvəl İsrail ərəb dövlətləri arasında yalnız Misir və İordaniya ilə diplomatik münasibətlər qurmuşdu.
Tətbiqimizi yükləyə bilərsiniz
