Rospotrebnadzor (Rusiyanın İstehlakçı Hüquqlarının Müdafiəsi və İnsan Rifahına Nəzarət üzrə Federal Xidməti) Rusiyada üç Ermənistan şirkətinin spirtli içkilərinin satışını dayandırıb.
Yeniavaz.com xəbər verir ki, qadağa “Vedi-Alko” QSC, “Abovyan Konyak Fabriki” MMC və “Şahnazaryan Şərab” və “Konyak Evi” MMC tərəfindən istehsal olunan şərab və konyaklara şamil edilir.
Agentlik iddia edir ki, bu şirkətlərin məhsulları məcburi tələblərə cavab vermir.
Qeyd edək ki, mayın 20-si Rosselxoznadzor Ermənistandan gül idxalına məhdudiyyətlər qoyub. Bu, Rusiyanın fitosanitar rifahını və ixrac potensialını qorumaq zərurəti ilə izah edilib.
Mayın 22-si isə Rospotrebnadzor Ermənistandan Rusiyaya “Cermuk” mineral suyunun idxalını və satışını qadağan edib. Departament bildirib ki, suda bikarbonat (ion), xloridlər və sulfatların yüksək səviyyələri aşkar edilib.
Qeyd edək ki, Rusiya uzun illərdir ki, münasibətlərinin pisləşdiyi ölkələrdən müəyyən məhsulların idxalına müntəzəm olaraq qadağalar tətbiq edir. Ermənistanda iyunun 7-si parlament seçkiləri keçiriləcək. Rusiya açıq şəkildə Ermənistandan hazırda ev dustaqlığında olan iş adamı Samvel Karapetyanın seçkilərdə iştirak etməsinə icazə verməsini tələb edir. Rusiyayönlü botlar sosial mediada ölkənin Baş naziri Nikol Paşinyana qarşı kampaniyaya başlayıblar.
Tətbiqimizi yükləyə bilərsiniz
