Başqalarına xidmət edənlər daha xoşbəxtdir

İşində daha çox məmnun və xoşbəxt olan insanlar əsasən başqalarına kömək edən peşələrdə çalışır.
Yeniavaz.com xəbər verir ki, bu nəticə Çikaqo Universiteti tərəfindən aparılan araşdırmada məlum olub.
Tədqiqat 27 587 nəfərin iştirakı ilə aparılıb və onlara işlərindən nə dərəcədə məmnun olduqları barədə suallar verilib.
Nəticələrə görə, işindən “çox məmnun” olduğunu deyənlər 47 faiz, “çox xoşbəxt” olduğunu bildirənlər isə 33 faiz olub.
Ən xoşbəxt peşələr sırasında ruhanilər birinci yerdədir. Onların 87 faizi işindən razı olduğunu bildirib. Yanğınsöndürənlər (80 faiz) və fizioterapevtlər (78 faiz) də yüksək məmnunluq göstərib. Müəllimlər, psixoloqlar, yazıçılar, rəssamlar və digər yaradıcı və təhsil sahəsində çalışanlar da xoşbəxt peşələr arasında yer alıb.
Araşdırmaya görə, bəzi yüksək statuslu peşələrdə xoşbəxtlik nisbətən aşağıdır. Məsələn, həkimlər və hüquqşünaslar yüksək gəlir və nüfuza baxmayaraq, ən xoşbəxt peşələr siyahısında ön yerlərdə deyil. Bunun səbəbi kimi iş stressi və böyük məsuliyyət göstərilir.
Ən aşağı məmnunluq isə fiziki və xidmət sahələrində çalışanlarda müşahidə olunub. Dam ustaları, kassirlər, barmenlər və qablaşdırma işçiləri bu qrupdadır.
Tədqiqatın rəhbərlərindən Tom V. Smit bildirir ki, insanlara kömək etmək, öyrətmək və qayğı göstərmək kimi işlər daha çox məmnunluq yaradır.
Ümumilikdə nəticələr göstərir ki, iş məmnunluğu yalnız maaş və sosial statusla deyil, həm də işin mənası və cəmiyyətə verdiyi fayda ilə birbaşa bağlıdır.